معايدات ناس الجريف

[وليد عثمان علي سنقد]

أحبتي الأفاضل ..
تحية وإحتراما ..


قام نفرٌ كريم من أعضاء موقع ومنتديات الجريف شرق بعمل معايدات لبعض أعضاء المنتدى وأسرهم ..

في محاولة منهم للم شمل أعضاء المنتدى ومباركة العيد لهم ولأفراد أسرهم الاكارم

وقد حرصوا على زيارة كل أعضاء المنتدى .. ولكن لكبر حجم عددهم (ماشاء الله) الـ 730 عضو وأسرة ولضيق وقت إجازة العيد ..

وبسبب إهتماماتهم الإجتماعية الأخرى .. لم يستطيعوا أن يُغطوا كل أسر الأعضاء

وقد إكتفوا بزيارة جزء مقدر منهم ..

وياااا الطيب الامام .. ما تشفق .. بنجيب ليك الصور المصاحبة للمعايدة ..

هاكم عيدوا ..




وإلى حينها دوموا لنا في أمان الله وحفظه ..

[الطيب الامام الطيب الامام]

وليد والله انا قاعد ليك فى راس بيت المنتدى ومنتظر الاشياء الفاقدنها وانت مالقيت الا تبوظ اعصبنا بالصورة الاولة ده اسرع قرب تعال ماتبتعد

[وليد عثمان علي سنقد]

خليك في راس بيتك دا يا الطيب ..
لغااااية ما نجيب ليك البسر بالك .. ويطمن قلبك ..
وتشوف أخوانك بيجاي لامين وتامين كيف ..

دي كانت نقطة الإنطلاقة ..



الرائع الحبوب محمد زين نابري في إستقبال عابدين القاسم وشخصي الكحيان ..
والفرحة والسرور باينات في جضيماتو ..



يظهر في الصورة من على اليمين هيثم الباقر (جا من الهند جدييييد كرت) وعابدين القاسم (ود قاسم بابكر) ود سنقد وصاحب المنزل محمد زين ..
وطبعا إكتشفنا حب ووله محمد زين للمنتدى وعشقه له ..
وذلك من خلال تواجده المستمر بصفحات المنتدى .. رغم ظروف عمله ودراسته ..

أها يا الطيب كفاك ولا أزيدك ؟؟

تصوير علم الهدى ،، أقصد أيمن السر ..

ودمتم ...

[وليد عثمان علي سنقد]

معليش يا جماعة ..
الصورة دي لقيتها واقعة هناك ..
بتكون وقعت من فوق .. عفوا ..




ودمتم ...

[احمد مبارك عبدالصادق]

كل عام وانتم بخير , ولكم جزيل الشكر علي المعايدات و ان شاء الله تتموا جميع اعضاء المنتدي
ومشكور كتييييييير ياوليد علي الصور ,
شنو ياهيثم حمد لله علي السلامه وان شاء الله دائما معيد في الجريف
ولكم الف تحيه والف احترام

[الطيب الامام الطيب الامام]

ربنا يجمعكم دوما على الخير والف حمد لله على سلامتك ياهيثم وعشان كدى مختفى فى طبق اليوم ومشيت محل الرجلة على اصولها الرسول فيك اكلى رجلة بى كسرة مرة كيتن كده لى الهندى واختمها بكباية شاى كاربة من الحاجة ربنا يطولك فى عمره وياوليد منتظرين المزيد وكانت المفاجاة العملاق الفز محمد زين

[احمد عثمان حاج حمود]

يا سلام

العيد عندكم يا ناس السودان


كل عام والناس طيبين


ابداع تمام يا شباب

إنشاء الله دايماً تامين ولامين

ومشكورين كتير

العيد الجاى معكم فى السودان

[وليد عثمان علي سنقد]

حبيبنا أحمد مبارك ..
تحية وإحتراما ..
تشكر على المرور الطيب ..
وهيثم معانا في حفظ الله وعونه ..

والصورة القادمة مُهداة إليك يا عزيز ..



والزيارة التالية كانت لمنزل العزيز الطيب نصر الدين ..
وصادف أن وجدنا معه الغالي الامين بديع ..
فلهم التحية والتجلة ..



وبعد تبادل التحايا .. تحدث إلينا الأمين بديع مُعللاً أسباب غيابه عن المنتدى ..
وذلك بسبب ظروف وضغط العمل خارج السودان ..
ووعد الحضور قريباً ‘إن شاء الله تعالى ..






ودمتم ...

[وليد عثمان علي سنقد]

أستاذنا أحمد عثمان حاج محمود ..
لك التحيات الكتارات ..
ونتمنى من كل قلبنا أن تعيد معانا بالسودان ..
وسط أهلك وأحبابك ..

وهاك دي ..

الزيارة التالية كانت لمنزل أخوانا منير وماهر ومعز أولاد السماني ..




وهنا أبت نفس مودة إلا وان ترافقنا لتنال شرف زيارة أحبابنا أولاد السماني ..



ويظهر هنا الفنان أيمن السر بعد أن إنتزعت مه الكاميرا عنوةً ..

وشهدنا كرم وحفاوة أهلنا الجرافة ..



وخرجنا من منزلهم بعد أن إنتابنا إحساس بوجودهم بالمنزل حال زيارتنا لأسرتهم ..

[ابو تراجى]

وليد سنقد وايمن تصلوا لغايد بيت ناس عمنا السمانى
وما تدخلوا بيتنا
الله يسامحكم

[وليد عثمان علي سنقد]

بطل الشفقة يا عمنا ..
بعد خروجنا من بيت أولاد السماني ..
أنعطف الركب شمالاً لمنزل الفنان الزوق الأنيق أبو تراجي ..



وخرجنا من منزله ينتابنا إحساس بعدم مغادرة منزلهم ..
لما وجدناه من طيب خصال وكرم ضيافة ..




ودمتم ...

[/COLOR][/SIZE][/CENTER]

[عصام عبدالصادق]

الحبيب ود سنقد
الله يبارك فيك ويكثر من أمثالك دوماً وكم هي عظيمة الجريف بأن أهدتنا ود سنقد وصحبه الكرام..
بالنسبة لدخلة أبو تراجي ... معليش يا وليد ... الشفقة دائماً بتضبع سيدها ... ولو ما عمل كده يعفوهوا كيف إنو أبو تراجي
ويدوم الود...

[الجرافي]

هي ياجماعة أخونا الحايم ذاتو بي جاي

كمل سريع سريع حوامتك الضحية منتظرك فى الهند والاتجيب معاك خروف من السودان .

مشكور كتير ياوليد

علي هذه اللفته بارعة الجمل
شكل المعايده الواحد يتمنى لو كان معاكم
لكم التحية جميعنا وربنا يدوم الود والمحبة بين الناس

[عادل مختار الزين]

ياود سنقد والوفد المرافق ، دائماً لفتاتكم بارعة
إن شاء الله تكونوا دقشتوا بيتنا؟؟؟؟؟؟؟؟

[ابو تراجى]

بارك الله فيكم على الزيارة
بس الظاهر جيتوا بيتنا بعد
كلامى !!!!!!
ده ظن بس بعدو ما فى اثم !!!

[المينقو]

كحو....كحو....كحو...عارف العشراقة دى من شنو ياودالفولت...؟؟؟؟؟؟؟

[وليد عثمان علي سنقد]

اقتباس : المشاركة الأصلية كتبت بواسطة عادل مختار الزين [ مشاهدة المشاركة ]

ياود سنقد والوفد المرافق ، دائماً لفتاتكم بارعة إن شاء الله تكونوا دقشتوا بيتنا؟؟؟؟؟؟؟؟

أستاذي وحبيبي عادل ..
عيد مبارك ..
والله يا عادل حرصنا وإجتهدنا إننا نصل بيتكم ..وننال شرف معايدة أسرتكم الكريمة ..
لكن يمين باءت محاولاتنا بالفشل .. لأنو زي ما ذكرت لكم .. ضيق الوقت وحاجات تانية منعتنا وحالت دون ما نشتهي .. فلك ولهم العذر والعتبى ..

وهاك دي ..
بعد داك الجماعة قالوا لازم نعرج على بيت ناس تسالية ..
وقد كان ..



وكان في إستقبالنا والده العزيز .. وما قصروا ناس البيت طب في واجب الضيافة ..

وكانت الإبتسامة لا تفارق محياهم منذ أن ولجنا دارهم وحتى خروجنا منه ..



ويدوم الود ...

[وليد عثمان علي سنقد]

بعد داك زاق مننا الهندي هيثم ود الباقر ..
طبعا هو عملها حركة منه عشان نجيه في البيت ..
لكن قلنا خييييير وبركة .. نمشي عليه ..



وقعدنا وشربنا عصير ما عرفناه شنو .. شكله هندي ..
وجابوا لينا الشاي سادة .. وقال لينا البهائم سرحن ..
غايتو شربناه مجبورين .. وكل واحد يعاين للتاني ..
وأظرف ما في الأمر الشاي كان في كبابي شاي اللبن ..
الكبابي أم صحن ديك .. والجماعة ما قصروا تب .. دفروا الصحانة بعييييد
وشربوا الشاي بدونها ..



ويدوم الود ...

[وليد عثمان علي سنقد]

اها بعد داك مشينا ليكم على ناس الوجيه عمر حسن حمزة ..



وطبعا الراجل لقيناه طريح الفراش .. مضروب ملاريا ..
وطبعاً حلف بالتقطعه الملاريا دي دقشته بالسودان ..
ونحن ماقصرنا معاه .. وأصرينا وأعلنا له غياب الملاريا في السودان في الآونة الأخيرة .. وإنو الملاريا دي جابها لينا معاه من غادي ..
وأعلنا حالة التأهب القصوى وقلنا لناس البيت الراجل دا ما يطلع من هنا أبداً ..
ومافي واحد يدخل عليه .. وخرجنا منه بإصابة الكأميرا بفيروس الملاريا ..

وربنا يشفيه ويعافيه يااااارب ..


ودمتم ...

[وليد عثمان علي سنقد]

بعد أن قمنا بإصلاح الكأميرا من عدوى ملارية عمر حسن حمزة ..
توجهت عيون الكأميرا لتجسد لكم أحداث زيارة الوجيه رحال ..



وصادفنا معاه أخونا محمد الحاج (كارتيه) وطبعا كارتية ماخد راحته على الآخر ..
وما صدق ..





ولهذا الموتر قصة .. نترك روايتها للرائع ود السر ..






ودمتم ...