أمة الله في قليبها

[allarinja]

شايله في لسانها الوفاء ودبله في ايديها تعلن فرحة
الزول البريدها وفي قليبها امة الله بدون فرز
احساسها مرهف مابتجامل راقية جدا!!!!!
شايله حبي في عيونها راية تعلن الفوز والهزيمة
في كل بيت معلن حضورها كل شارع وكل زقاق حافظ خطاها
حتي أطفال الشوارع والكلاب مابتهوهو في مشيها
والطيور مابتخاف من صوت مشيها
الا أنا بعتريني الخوف عليها كيف بتقدر تنسجم وتندمج
في كل زول وكيف تعبر عن هواها..
أحلي حاجة مابتكرر مفرداتها كل حته في جسيمها
بيمتلكها فرد واحد من هواها
ورحمة الله ساتره ليها عمرو مابتكشف غطاها

[الطيب الامام الطيب الامام]

الاخ .............. نورت ومدنا بابداعاتك اصلك رقيق المشاعر وقلبك رهيق وبطلع اشياء جميلة بجمال طولك واقولك بى زيارتك بيتنا نور والله نور كل ليلة وحان الزفاف وانا حالى كيفن بوصفوا --وانت يا الابيض ضميرك كل هذه الكلمات ارجع الى الوراء وعيد الماضى البعيد

[البــ ع ــد الثالث]

لك كل الزكريات من قلبى مهداه وان كانت اسية فلاتلمنى بل لم الحــــــــــ......ــــــــــــظ
مع امنياتى لك بحظ افر

[allarinja]

ياتو مطرتن سوت شو
وياتو رصاص ماعقبو خلاص
منتظر اجاباتك عن الهوية

[allarinja]

عذرا يابعد من الشوق ابقيت الدال عندي

[allarinja]

ياود الامام ابقيت كل الشوق عندي فسبقني اليك بكل نوازعي أشتاااااقك

[البــ ع ــد الثالث]

جاييك .... عابر الطريق رغم المطر
جاييك ... شاقى الفريق زافى الخبر
جاييك ... بصمة خطاى فى الطريق
تشهد بطول المسافه
تارك وراى همى وأساى
والحسرة والشوق والحسافة

[allarinja]

انتظرتك في كل الطرق
وطال انتظاري بس خوفي لو طال انتظاري ا قول منو

[allarinja]

أن تخونك حبيبتك فهذا عادي وستجد مليون سبب
وهي ستجد الف مليون مبرر
ولكن مع من خانتك !!!
إن كان صديقا ...
فالله يسامحها ولكن أنا لن أسامح..
ولكن أن تخونك مع أمة الله ومع سكان الخرطوم وعلي ساكني الأقاليم
مراعاة فروق التوقيت ..
فهذا ربما يكون لسوء الإختيار ...ولكن عندما يكون حسن الإختيار لسنين
ويأتي بعده الخيانه وتغرس كفها تجتث شرايينك وأوردتك فتكون الخيانه
الأولي لها جارحة ومؤلمة وقاسية ولكن الإستمرار في الخيانة يقتل ماتبقي من كره وحقد
وندم لأنك وهبت حبك لمن ترغب في توحيد الكون ..

[allarinja]

إتصل علي العم عمر حامد وأسمعني قصيدة كرهتك
وكان الإلقاء مؤثراً وحزينا وقد صاحبت الإلقاء موسيقي
تصويرية جسدت معني الكراهية وجعلت النغم رغم الحزن
إلا أنه يحمل الوضوح والكبرياء ..
__________
لم أجد كرهاً بهذا العمق ...
فتذكرت تلك الفتاه وكيف أن أمة الله في قليبها..
عشقته اللحظة التي سرقتها مني ...عشقت الصمت الذي واجهتني به
عشقت الحسرة التي أصابت صديقي ... عشقت الفراق الذي أكسبني رضاء والدتي
ولكن ..
مزقت دفاتري وتصاويري وأحلامي وآمالي ..ومازلت أحتفظ بقيد الخطوبة
الحديدي ...ذلك السجان الصغير المدور الذي يقيد أصبعي ..
نعم أبكاني العم عمر وتاورني الجرح ...

[allarinja]

شكراً للعم عمر حامد

انا بكرهك للاخت الشاعرة نضال الحاج



انا بكرهك
بس بكرهك
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد قلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لونت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ قلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك
مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
على كل حال
انا بكرهك

[عمر حامد مجذوب]

التحية للإبن الأمين و مشكور على تنزيل القصيدة و أرجو من الإخوة أن يصدروا حكمهم على المعنى بالقصيدة.