تسـالية زاتـو زِعِــل؟؟؟؟

[صديق النعمة الطيب]

ذكر الحبيب أيمن السر في بوست (نجمة و سودانية) ما يلي:
(تسالية زاتو زِعِل)... و كلمة "زاتو" راجعة ل (فاوضني بلا زعل)...
و الله يا أيمن أحييك و أقف احتراماً و إجلالاً لك على هذه الأحاسيس و المشاعر النبيلة للمنتدى و أهل المنتدى، بس نقول ربنا يديك العافية و الفي مرادك و يسعدك،،،
و كتب الأخ حس أربعة ستات (Hass6666)
والغريب والأغرب عندما أكتب أحاول أن أظهر وأدعى وأجمل وأنسق وأجتهد وأدخال الثقافة والمجتمع و ووووووووووووووووووووو وأكون ضمن الذين يدافعون عن الكلمة الطاهر ،،، (أجد نفسي أرددها ارددها بتلقائية )؟؟؟؟؟
عجبـــــــــــــاً ،،،،،،،،،،،
يا عزيزي
المصلحات والألفاظ ليست محتاجه الى منبرك كى تساهم بوعي او بدون وعى فى نشرها للأخرين .
+++++++++++++++++++
بين هذا و ذاك...
تسالية يدعو للمفاوضة بدون زعل و لكنه في نهاية الأمر لاذ بالزعل و بسرعة أدهشت الجميع، مما جعل أيمن السر بتلقائيته الرزينة يستشهد به و الاستشهاد هنا له مغزى فتسالية من الناس الذين ننتظر منهم الكثير فقد تسلل إلى قلوب الجميع و لكنه قرر أن يحرمنا من عطائه بدعوى المشغوليات رغم أنني من الذين هاتفوه و وعدني بالعودة، و من هنا نكرر الدعوة لتسالية بالعودة و ليست العودة "بالقطارة"...
على الرغم من غياب تسالية عن المنتدى إلا أن شعاره ظل موجوداً و بقوة في نفوسنا، و قد حكى لي أحد الأعضاء في المنتدى في حديث معي أن من الأشياء التي لفتت انتباهه و جعلته يتمسك بحضوره الدائم هو هذا الشعار الذي ترك فيه أثراً و انطباعاً لم يغادر نفسه حتى الآن فقد ظل يردد و يردد و يردد الشعار بمناسبة و من غير مناسبة،،،
و نجد أخونا حس أربعة ستات، يقول (أجد نفسي أرددها أرددها بتلقائية)، و هو يعني الكلمات الهابطة، و الترديد هنا مصدره في الغالب الأعم كثرة الاستماع و تداول هذه الكلمات في جميع الأوساط و المنتديات حيث أنك تجد نفسك مجبراً على ترديدها بلا وعي لأنك قد اختزنتها في الذاكرة بلا وعي و بدون اختيار، مما يجعل حتى محاولات مسحها من ذاكرة الناس تساهم في عملية نشرها و ترسيخها ، و ذلك ليس عيباً في محاولة المسح نفسها و لكن العيب في عدد المحاولات وجديتها و جدية من يساهموا في مسحها، لأنه لا بد من شخص يقول هذا الشئ خطأ، و لتحديد الشئ لا بد من وصفه أو ذكره و هنا تكمن الخطورة التي تتطلب المزيد من الوعي،،
"رغم أن خيط الربط بين الاثنين يبدو رقيقاً و شفافاً جداً"،،،
إلا أن ني أحاول إظهار الربط بهذه الأسئلة....
هل يعيب الإنسان أن يرفع شعاراً و يسعى لتحقيقة حتى و لو سقط في نصف الطريق و فشل في تحقيقه، و هل يعيبنا في المنتدى أن نتجمل و نتأنق و نرسم و نلون الكلمات النقية الطاهرة حتى و لو فشلنا في رسمها أو تطبيقها على أنفسنا، بهدف الإكثار من تكرارها فربما يكون التكرار الذي أدى لترسيخ الكلمات الهابطة يتحول هو نفسه إلى وسيلة لأن نطبق أو على أقل تعديل ترديد ما نقول رغم ما فينا من تقصير لا يغيب عن الجميع، و هل محاولة إنكارنا لبعض الممارسات الشاذة تعد مساهمة في نشرها بوعي أو بدون وعي منا و من ثم يكون الحل الأسلم هو التغاضي عنها، وما هو الحل إذن،،،،
و في الختام دعوة للأخ تسالية بالعودة و في طريق العودة عليك بإحضار حسن عوض، و يا جماعة العارف رقم تلفون حسن يكتبو لينا هنا،،،،

[معذ السماني الحاج ياسين]

اخي صديق التحيه لك
ومن هنا التحيه عبرك الي تساليه
وحسن عوض عباس
ولكن لا اعتقد انهم سوف يعودون
هذا اعتقاد ارجو ان يكون (خطا )
ولك ودي
لن اقول لينا عوده لان
لينا عوده بداءت تفقد حيويتها تدريجيا

[صديق النعمة الطيب]

الأخ الغالي جداً معز.........
لنا عودة و لك إنشا الله و إذا لم نعد تأكد يا عزيزي أننا نحن الخاسرون، لأن المنتدى أصبح كيان و إن شئت مؤسسة أكبر من الهندي و تساليه و صديق و معز وغيرهم، و له رواده الذين سيتحفونه بكل ما شيق و هادف و سيقاتلون من أجله و سيسهرون من أجل صموده، هكذا هي الانجازات التاريخية الضخمة لا تتوقف على فرد رغم ما يعتصرالقلب من ألم لخروج أي فرد ناهيك عن أناس تواشجنا و ترابطنا و تعاهدنا معهم،،،
عموماً فقط أريد منك أن تنبذ نبرة الحزن و الئشآؤم التي بدت في كلامك و أن تقول بدلاً منها أن الجميل و السعيد لم يأتي بعد، حتى و لو تنحينا و بعدنا فهناك دائماً من سيواصل المسير و الفرد يظل في حاجة للجماعة و ليس العكس،،،

[معذ السماني الحاج ياسين]

اخي صديق النعمه التحيه لك
اولا :
القصه ماقصة حزن ولكن القصه اكبر بكثير من ذالك
واتفق معك ان المنتدي لا يقف علي شخص بعينه ولكن
واتمني ان يستمر المنتدي الي ان تقوم الساعه ولكن صدقني لو
بهذه الطريقه لن يستمر كثيرا
اما بخصوص الاخ تسالية وحسب معرفتى واحتكاكى به
ليس له نصيب من توقيعة(فاوضنى بلا زعل) لا من قريب ولا من بعيد ( سمح مني موش )
حقيقة غيابة ترك اثر كبير وفرق علينا ولكن على ما اعتقد وحسب علمى
انه زعلان من موقف معين من احد الاعضاء حسب كلامو معاى وباقى الاعضاء
لانهم لم يعترضوا على اساءة هذا الشخص له
بل هنالك من ايده وسانده على ذلك بشكل او باخر
وقال لى بالحرف الواحد
طالما ان المنتدى سوف يكسبه العداء (بلاش منو)

وبعد ونسة طويلة وعدنى بالعوده فى وقت قريب ولكن على ما يبدو انه كان مجرد وعد

تخريمه :

وطمنى انا عندى ظن ياتسالية
حتجى وللا نمشى

لن اقول لينا عوده لان
لينا عوده بداءت تفقد حيوينها تدريجيا

[صديق النعمة الطيب]

المنتدى عبارة عن نافذة يعبر عبرها الأصدقاء و الأخوان عن همومهم و هموم الجريف و السودان، لذلك من الخطأ الجسيم أن نختصر المنتدى في فرد أو أفراد أخطأوا في حقنا لا سيما إذا كنا نضع المصلحة العامة في الإعتبار،،،
و كنت قد تمنيت لو أن تسالية أتى و أفصح عما نفسه فربما يكون الخلاف ناتج عن سوء تفاهم و أحسب أنه كذلك،،،
لأننا بصراحة أخي معز لا نريد من المنتدى أن يكون مثل السودان الكبير، كل يوم حركة انفصالية من جهة و تكتلات و أحلاف، نتمنى أن نفض الخلافات في الخفاء حتى لا تؤثر على البقية الباقية، و أن نحاول بقدر الإمكان أن نكتم المشاعر السلبية في أعماقنا و أن نبدو للآخرين في أحسن صورة، و ذلك لأن المشاعر السلبية معدية "العدوة الإجتماعية"، بمعنى أنك لو أبيديت مشاعر الإحباط و التراخي فذلك سوف يؤثر على الآخرين سلباً،،،
لذلك دعنا نتجمل بالفرح و دعنا نتجمل بالأمل و أن نفترض في الآخرين حسن النية قدر الإمكان، أعلم أن هذا ربما يكون صعباً و لكنه من خصال النبل، فدعنا نحاول ذلك فربما وفقنا و نجحنا و تحول الإدعاء إلى حقيقة،،،،
أخي معز الحياة مليئة بالمشاكل فإذا حاولنا أن ندور حول كل مشكلة على حده صدقني سنستنزف جهدنا و طاقتنا في كلام ربما يؤدي لعكس ما نريد، و المصيبة الكبرى أن تسالية محور النقاش غائب و حسن عوض رايح، دعنا نحاول نحن أن نكون خيراً مما كنا و إن كنا أخطأنا و فشلنا من قبل... فالفشل و الخطأ كما يقولون هما الدرجات التي نصعد عبرها للنجاح،،،،
و لك من الود ما يكفيك و يكفي تسالية و حسن عوض و يفضل،،
ديل عرفنا مشاكلهم و طيب عبد الله نابري مالو، أنا غايتو ما عارف لكن بلوم الهندي عمله لينا سياحة في الهند و السند و عايز يثبت لينا إنو فعلاً هندي و سايب لينا عبد الله لافي في الشوارع و ما عارفين الحاصل عليهو شنو،،،،

[بدر عبد الماجد بله]

صديق النعمة كتب:
ديل عرفنا مشاكلهم و طيب عبد الله نابري مالو، أنا غايتو ما عارف لكن بلوم الهندي عمله لينا سياحة في الهند و السند و عايز يثبت لينا إنو فعلاً هندي و سايب لينا عبد الله لافي في الشوارع و ما عارفين الحاصل عليهو شنو،،،،



أضحك الله سنينك يا صديق ، اخونا عبدالله نابرى أبشرك فى أحسن حال ( يستعد للزواج ) الايام دى داير فاتحات ودعوات تقيلة لانو البيهو ماهو هين ، طبعاً الراجل فى صراع شديد مابين العزوبية وفطور العريس الشايلو هم أكتر من العرس زاتو ]

[صديق النعمة الطيب]

طيب يا جماعة ما تقولوا كده من الأول و تريحونا، و بعدين حكاية الدس دي شنو يا ناس المنتدى، عصام جاب بنت داسيها لحدي ما الخبر ريحتو طلعت، و أسه عبد الله كمان شغال بالدس و لا نحن البعاد منكم... و شايفو كمان رسل الهندي يجيب الشيلة من الهند أنا ما عارف بضاعة جده ما بقولو كويسة و لا الحاصل شنود، يعني الصندل في الشيلة حا يكون جتر جتر،،،
و الله قلبنا مع عبد الله و ربنا يتمم ليهو بالخير و أيام العرس تعدي قوام قوام، و الله ما داير أخوفو لكن اليوم الواحد من أيام العرس بسنة صرف.... و الله في موجود ما تخاف أيام و بتعدي،،،
تحياتي و الله يا بدر و الزول أركزو معاهو و اليومين ديل راقبوهو كويس،،

[عبدالله محمد نابري]

"النعمة" صديق النعمة
قبل شوية كنت في زيارة لبوست ايمن بتاع ملودي تتحدي الملل ..
وصراحة زعلت شديد ولمت نفسي شديد وطلبت منكم المعذرة والسماح .. لاني بالجد مقصر
بس برجع واقول الوتد والواطة ..
احساس انك ماش السودان عشان تعرس ده احساس غريب لا تعرف تفرح ولا تعرف تزعل احساس الفرح عشان العرس .. واحساس الزعل عشان الصرف السنوي في اليوم الواحد ذي ما قلت ..
لكن بصراحة الاحساس الاول اكبر واشمل ...
بس برجع واقول معذرة واتمنى ان تجد لي العذر ..

[عبدو(كمبيوتر)]

صديق

من غير ميعاد رائعة التيجانى سعيد اداء الامبراطور وردى

من خلال كلماتها المصاغة بدقة شاعر ( حسييس) واداء راقى

هى مشاركتى حول النقاش الداير .

سررت غاية السرور عندما رايت ( النسيب ) الغائب

عبد الله ودنابرى يطل عبر نافزة ( تساااااااااالية).

سلم

اظهر وبان
وعليك الامان




http://www.youtube.com/watch?v=p0jV5ir7D_I

[صديق النعمة الطيب]

و الله يا كمبيوتر جد إنك بتثبت مقولة أن المستمع فنان لا يقل فناً عن الفنان المغني و إنك إنسان (حسييس) بالمناسبة دي عمر احساس ساكن جنبكم و لا شنو،،،
يا عبد الله و الله العظيم نحن مقدرين حالتك، و شافين بإحساسنا مشاعرك، و بندعو ليك ربنا يحفظك و تعبر بالسلامة، الشغلانة يا خوي زي ما قلت ليك ما بتخوف إطلاقاً، صحيح في ناس ممكن تجن و في ناس ممكن تقطع هدومه و في ناس بتعمل عمايل عجيبة تدعو للرعب و الخوف من الزواج لكن برضو هي شغلانة بتاعة كم يوم، و المثل بقول ليك ما لا يقتلني يقويني يعني حتى السم الذي لا يقتلك يزيدك قوة،،،
يا سيدي لا تحزن نحن مقدرين ظروفك و ظروف الجري و صدقني من أسعد لحظات الانسان في الحياة هي هذه اللحظات التي تمر بها الآن و لا تنسى أن الزواج عبادة و العبادة تزداد حسنانتها كلما زادت مشقتها، بس نصيحتي ليك (أعمل ما تراه أنت مناسباً و ليس غيرك)و عارفين إنو كل عضو من الأعضاء ممكن يمر بظروف و أنا شخصياً الأسابيع القادمة غالباً ما لا أستطيع الدخول لبعض الظروف، و من هنا نتمنى لك دوام السعادة و ربنا يجمعك بذات الدين لتسعد و تهنأ في الدنيا و الآخرة،،،
و بنتمنى من الجميع أن يساعدوا المنقطعين على الحضور بالكلام المعسول الجميل و أن لا نغلق لهم أبواب الرجعة، فكلنا معرض للزعل و خيرنا من يتخطى الزعل و يرجع قوام قوام...

[معذ السماني الحاج ياسين]

كتب الرائع صديق النعمه

لأننا بصراحة أخي معز لا نريد من المنتدى أن يكون مثل السودان
الكبير، كل يوم حركة انفصالية من جهة و تكتلات و أحلاف،


اخي صديق الكل يراي انني هذه الايام في حالة زعل
عشان كده قاعد احاول بقدر الامكان ما اكتب كتير
من ناحية ان المنتدي ماشي لحركات وانفصالات
دي حقيقه وده نتاج طبيعي للمجاملات الحاصله كان من الاداره
او الاعضاء
ولو استمر هذا الحال اظن ان المنتدي سوف يبدا يوميا في
فقدان شخص بقض النظر عن من هو
عشان كده بتمني من كل الناس كتابة رايهم بكل وضوح
بعيد عن المجامله
والبعد عن الردود الفيها مجامله الي اشخاص بعينهم
وارجو من الاداره وضع ضوابط وقوانين لكل الاقسام
ومحاسبة من يخطئ في حق اي شخص
والكلام ده عباره عن وجهة نظري الشخصيه لسير المنتدي
ولكم ودي

[عبدو(كمبيوتر)]

معز وحات الخوة خلييييييييييييييييييييييييييييييييييييك:)


ويا تسااااااااااااااالية عز الرسول.....!(ص)

[معذ السماني الحاج ياسين]

معز وحات الخوة خلييييييييييييييييييييييييييييييييييييك:)


ويا تسااااااااااااااالية عز الرسول.....!(ص)


كمبيوتر ياخوي انا قاعد ما ماشي
اي حتي
اما بخصوص تساليه انا تعبته معاهوا
كلوا يوم بقول ليهوا خش وبقول لي انشاء الله
ولا جديد
ولك ودي

[صديق النعمة الطيب]

أخونا كمبيوتر المشاعر و الأحاسيس، دخلتك علينا عيد،،،
الغالي معز،،،
بس عايز أقول ليك و الله الحياة ابسط من كده، و نحن ما عايشين في جنة و لا في مدينة فاضلة، كلنا بنغلط و كلنا بنطلع من طورنا، و كلنا عندنا شللية و كلنا بنتعاون على الخطأ أحيانا بجهل و عدم إدراك، لكن كلنا بنتفق إنو الواجب عدم فعل ذلك و نسعى لتطبيق ذلك عن طريق المنتدى شويه شويه،،،
يعني أنا و انت عندنا تاريخ في الأخطاء لو الناس حاولت تتبع أخطائنا صدقني و الله لا أنا و انت حا نكتب تاني في المنتدى،،،
عشان كده كل واحد يحاول يكتب بطريقته الخاصه حتى و لو كانت خطأ و بمرور الزمن صدقني بنقدر نبني ثقافه نسميها ثقافة "منتدى الجريف" و دي بتحتاج زمن طويل و طولة بال و قد بدأت فعلاً تتشكل،،،
حاول اكتب الفي راسك بدون استحضار ردود الناس و لو كان ما تكتب صحيح و أزعم أنه كذلك ف الناس حا تتعاطف معاك و تقيف معاك لو ما اليوم بكره و لو ما بكره بعد بكره و لو ما بعد بكره بعد بعد بكره و هكذا يفعل أصحاب الأفكار و المصلحون بدون ضجر و لا انزعاج،،،
أي محاولة لتغيير الواقع بالقوة حا تكون النتيجة نسف الواقع و فقدان المستقبل،،،
فلندع تساليه ياخد ليهو نفس و ياخد راحتو و لما يشعر انو مستعد حا يرجع براهو و نتمنى انو يرجع في يوم من الأيام،،
لأن الحديث عنه بهذه الكثرة سيقطع عليه طريق العودة و لنا عودة،،،

[saida sopahi]

لما تغيب عن الميعاد بفتش ليك فى التاريخ وبسال عنك الاجداد
الاخ تساليه الحاصل شنو ؟ لو قالو لى اى زول غيرك زعل وساب المنتدى ممكن اصدق بس انت لا المنتدى بمثل ليك حاجه كبير وماحصل دخلت المنتدى الا وجدتك فيه ياريت تراجع نفسك لانو نحنا محتاجين ليك
معز السمانى كتبمن ناحية ان المنتدي ماشي لحركات وانفصالات
دي حقيقه وده نتاج طبيعي للمجاملات الحاصله كان من الاداره
او الاعضاء
ولو استمر هذا الحال اظن ان المنتدي سوف يبدا يوميا في
فقدان شخص بقض النظر عن من هو
عشان كده بتمني من كل الناس كتابة رايهم بكل وضوح
بعيد عن المجامله
دا الحاصل فعلا الناس لو كتبت رايا بوضوح فى ناس بتزعل وبتعتبر الكلام والنقد موجه للانسان نفسه الكتب الموضوع وليس على الموضوع
واذا جاملتا وحبيت تكون ظريف بعتبروها محسوبيه وتحيز للشخص الانت مدحتو وبيعتبروه ملل وتكرار حقيقى ياناس المنتدى حيرتونا معاكم

[عبدو(كمبيوتر)]

لما تغيب عن الميعاد بفتش ليك فى التاريخ وبسال عنك الاجداد
الاخ تساليه الحاصل شنو ؟ لو قالو لى اى زول غيرك زعل وساب المنتدى ممكن اصدق بس انت لا المنتدى بمثل ليك حاجه كبير وماحصل دخلت المنتدى الا وجدتك فيه ياريت تراجع نفسك لانو نحنا محتاجين ليك
معز السمانى كتبمن ناحية ان المنتدي ماشي لحركات وانفصالات
دي حقيقه وده نتاج طبيعي للمجاملات الحاصله كان من الاداره
او الاعضاء
ولو استمر هذا الحال اظن ان المنتدي سوف يبدا يوميا في
فقدان شخص بقض النظر عن من هو
عشان كده بتمني من كل الناس كتابة رايهم بكل وضوح
بعيد عن المجامله
دا الحاصل فعلا الناس لو كتبت رايا بوضوح فى ناس بتزعل وبتعتبر الكلام والنقد موجه للانسان نفسه الكتب الموضوع وليس على الموضوع
واذا جاملتا وحبيت تكون ظريف بعتبروها محسوبيه وتحيز للشخص الانت مدحتو وبيعتبروه ملل وتكرار حقيقى ياناس المنتدى حيرتونا معاكم







تسالية
يا زول كفانه (سكرنا ) و( غمرنا) ..............................!!!!!

غيب وتعال يانا زاتنا بتلقانا.

بت الصباحى

يامرحبتين ...........!!!1 والبركة فى اجازة تساااااااالية...!



http://www.youtube.com/watch?v=YpWAN0nP0iI

[تسالية (سلم)]

تحية بحجم الوطن لكل الاعضاء
وخاصة للذين سألوا عنى فى الفترة الماضية
اها نجى للكلام الجد بخصوص الانقطاع وما ادراك ما الانقطاع
فعلا كنت زعلان من مواقف معينة
لان هنالك بعض من الاعضاء يقفون موقف عدائى من اصحاب الراى الاخر الذى لايتوافق مع هواهم
ودائما ما ينتقدونهم ويسبوهم ويحسبون ذلك هو الموقف الاخلاقى السليم
ويتصورون انهم اصحاب الاخلاق وانهم الوحيدون الذين على حق ومادونهم على باطل
متناسيين ان الاخلاق الانسانية اكبر من ان تحصر فى حزب او تنظيم واحد
يجب تصحيح تلك النظرة العوراء لان النظرة للاخر لست اسود او ابيض
بل هنالك الوان اخرى ولكل لون حكمة وتصور .


الدعاش صديق النعمة
حضنا دافى ونبعا صافى عليك مدلوق
ومشكور جدا جدا على السؤال والاتصال والبوست
وياها المحرية فيك
مؤونة عام من الود




رفيقى فى الغار
معز السمانى
ديل انحنا
القالوا فتنا
وقالوا متنا
وقالوا للناس انتهينا
جينا زى ما كنا اول جينا حضنك يحتوينا..
اعتقادك خاطئ فى مسألة الجية من عدمها
ومشكور جدا على ايضاحك للمسائل بخصوص انقطاعى
لكن يالذيذ فتيت الونسة كلها من(الالف للياء)ههه هههه

مؤونة 10اعام من الود


ود بلدى
كمبيوتر
سرى ناقمى
شوق ممدود وفايت الحد
مشكور جدا على السؤال المستمر
وربنا يديك العافية
تخريمة:
الغنية دى لى وللا للاخت سيدة صباحى

مؤونة عام من الود



النخلة
سيدة صباحى
مشكورة جدا على السؤال
اظنك بتوافقينى الراى فى مسألة
ان هنالك ظروف تجبر الانسان على فعل اشياء لا يريد فعلها


مؤونة عام من الود






الرائع
هيثم الباقر

مشكور جدا جدا على سؤالك عنى فى بوست عودة ستبل
اعتبر الايام الفاتت كانت استراحة محارب.
عشت فى صحة وامان
وليك عظيم الامتنان

مؤنة عام من الود




الجميل
عصام عبدالصادق
برضو مشكور على كباية الكركدى وكباية الشاى
(الشايل بيهم حالى)
لكن بحزرك المره الجاية اقل من خروف مابرضى
وعارفك بلباص
وكمان .......

مؤونة عام من الود



مخرج عريض:

أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا معايا زي ضلى
لو ما جيت من زي ديل..
كان أسفاي..
وآمأساتي..
وآذلي..

[بدر عبد الماجد بله]

الغالى تسالية لك كل الود والاحترام .
يكفى هذا التوقيع
فاوضنى بلا زعل
( ياخى طمنى انا عندى ظن ؟؟ )

[معذ السماني الحاج ياسين]

كتب (الزعلان ) هي العائد
تساليه
رفيقى فى الغار
معز السمانى
ديل انحنا
القالوا فتنا
وقالوا متنا
وقالوا للناس انتهينا
جينا زى ما كنا اول جينا حضنك يحتوينا..
اعتقادك خاطئ فى مسألة الجية من عدمها
ومشكور جدا على ايضاحك للمسائل بخصوص انقطاعى
لكن يالذيذ فتيت الونسة كلها من(الالف للياء)ههه هههه

مؤونة 10اعام من الود


ياخي اول حاجه حمد الله علي سلامتك
وبركه الزعل انتهي
ما بخصوص الفته بتاعة الفول هي الونسه
دي كنته مجبور ذي ما انت كنته مجبور
علي الغياب
بعدين ياعزيزي لشنو مؤونة 10 اعوام
بالنسبه لي والباقين اديتم عام واحد
ولكم ودي

[تسالية (سلم)]

الغالى تسالية لك كل الود والاحترام .
يكفى هذا التوقيع
فاوضنى بلا زعل
( ياخى طمنى انا عندى ظن ؟؟ )
الجميل بدر التم
مشكور على الود
واطمنك القادم اجمل ويوم باكر ضواى
ارقد بعافية
مؤونة عام من الود

[تسالية (سلم)]

[color="red"]بعدين ياعزيزي لشنو مؤونة 10 اعوام
بالنسبه لي والباقين اديتم عام واحد
ولكم ودي
سبحان الله توزيع المؤونة بجى (براهو) يعنى شى عفوى كده
ناس عام وناس عشرة اعوام وناس ليس لديهم نصيب منها نهائى
وبعدين ياعم طالما ادوك حاجة زايده عن الناس شيلا ساى واسكت
ههه ههههههه

[عامر عبد الوهاب]

عودا حميدا علي العوده يا غالينا وتاني كان كررتها
عارف انا بعمل ليك شنو ؟ خلاص سمح

[ابو تراجى]

والله ما عارف قريبى زعلان من شنو ؟؟؟؟؟
مع انو هو رافع شعار
فاوضنى بلا زعل
يقوم يزعل هو سبحان الله
المفروض نزعل نحن لكن الحمد لله
الذى جعل القلوب شوقاً وتحناناً
تزوب
فور موست

[صديق النعمة الطيب]

الأخ العزيز عمر،،
يا ريت لوكل واحد يكون حريص على المنتدى و يعرف كويس انو الزعل ما حل و ممكن يزيد المشاكل و يعقده، عموماً أخونا تسالية رجع و حسب كلامو انو ما حا يكرره تاني،
الرائع عبد الرحمن،،،
قريبك يا خوي في النهاية سوداني و كمان سياسي يعني حا تنتظر منو شنو شعارات براقه، المشكلة كلنا ناس كلام سااااي و لمن نكون قدام موقف بننسى كل شعاراتنا و كلامنا الجميل، عموماً يا ريت يكون درس تسالية عبرة لمن لا يعتبر،،،،
و أن نفهم انو الزعل حالة ممكن تصيب أي واحد، بس الواحد لما يزعل يمسك نفسو شوية و يعرف انو دي حالة عابرة، و يحاول بقدر المستطاع إنو ما يشعر الناس بزعلو، لأنو بمجرد ما تزول حالة الزعل الواحد بشعر بحوجتو للناس و بعرف إنو الغلط مرفوع و الناس ياهم الناس لكن "نظارة" الزعل ممكن تغير معالم الأشياء على الأقل لفترة مؤقته،،،

[عمر حسن حمزه]

و أن نفهم انو الزعل حالة ممكن تصيب أي واحد، بس الواحد لما يزعل يمسك نفسو شوية و يعرف انو دي حالة عابرة، و يحاول بقدر المستطاع إنو ما يشعر الناس بزعلو، لأنو بمجرد ما تزول حالة الزعل الواحد بشعر بحوجتو للناس و بعرف إنو الغلط مرفوع و الناس ياهم الناس لكن "نظارة" الزعل ممكن تغير معالم الأشياء على الأقل لفترة مؤقته،،،


كـــــلام جميـــــــــــــل و أصيـــــــــــــــــــــــــل ، كلنا محتاجين له ، فالزعل وارد في كل لحظة و هذا شيىء طبيعي و لكن الغير طبيعي أن نبني عليه موقف وننسى أنه حالة عابرة.

جيـــداً جيــــت و تسلـــم يا سلــــم

ومشكور أخي صديق النعمة أنعم الله عليك بالصحة و جعلنا و اياك من عتقاء هذا الشهر الكريم

[عامر عبد الوهاب]

ادعو ربي ببركة رمضان شهر التوبه والغفران ان تدومو
متحابين متكاتفين كالاخوان ونرجع ذي ذمان يااااااااااارب