ماضي الذكريات [الأرشيف]

بكرى الطيب هدية

07-13-2009, 07:07 PM

الذكريات في كل ليلة توحي للحبايب اشياء كثيرة
الفكرة ببساطة لكل واحد منا في تاريخه ماضي وكل ماضي له ذكرة حب جميلة
فمثلا العيد في الجريف يختلف عن أي مكان داخل السودان أو خارجه واسمحوا لي أن اسطحبكم في نزهة صغيرة يوم العيد بحلة سرحان وتأملوا معي منظر الناس وهم خروج لصلاة العيد باللباس الابيض الناصع وبعد الصلاة نشاهد اجمل لوحة للصفح والتسامح وتقديم التهاني والمعايدات 0
ثم تأتي النُوبة وما أدراك ما النٌوبة وتحرك الناس خلفها في منظر بهيج جذاب ويمضي الركب في رحلته الميمونة تطوف بعض الشوارع لينتهي بها المطاف داخل مسجد سرحان حيث تبدأ من جديد حلقة الذكر وتضرب النٌوبة ضربا فتئن وترن وتجن ولك عزيزي أن تتخيل معي هذا المنظر البديع 0
ثم نأتي الى قدح الفطور الذي يعده ويقدمه ويشرف عليه عمنا المرحوم الحادو حطي فتجده مشمرا عن ساعديه ورابطا شاله في وسطه ممسكا بالجردل والكمشة وهو يدعوا الناس بالجلوس للفطور كبيرهم وصغيرهم ولا يمكنك أن تفلت منه مهما حاولت 0 كرم لا يدانيه كرم وهو شيء متوارث ومنظر متكرر كل عام
تبدأ رحلة الزيارات وطبعا الباقي معلوم لديكم كان فطور عريس أو غيره 0
حقيقة ما دفعني للكتابة كما قلت اولا هناك ذكريات اجتماعية لا يمكن للانسان أن بنساها أو يجدها وأن وجدها لن تكون بنفس الروعة والجمال الذي اعتاده
فدعونا نجترها كذكريات لعلنا نجد فيها سلوانا وعزائنا ان جذء من هذه اللوحة الجميلة ما زال منها باقيا
ودمتم وفي أمان الله

الطيب الامام الطيب الامام

07-13-2009, 07:21 PM

الاخ بكرى الف تحية لك وانت تعيد علينا الزكريات التى طولن ماشفنها وكل الاعياد ونحن صلاة ودوام على طول والله فعلا العيد فى الجريف له اسر كبير فى انفسنا وانشاء الله العيد الجاى كلنا فى السودان ورجعتنا الى صباح العيد وزكرتنا العمه الله يرحمها ويسكنها فسيح جنتها زينب بت حاج على وهى تحوم علينا بالفطور وتمزح معنا ورجعتنا وقت انتهاء الصلاة والكل يصافح فى بعض وبنزع طاقة ذاك ويمزح مع هدا اللهم دوم السعادة والتراحم بيننا ورجعنا اليهم سالمين يارب

خضر حسن الفضل

07-13-2009, 10:28 PM

شكرا للأخوان بكرى والطيب ولكل من يأتى على هذا البوست من بعدى.
العيد عندنا يحمل كل المحاسن والمآثر الجميلة بالإضافة إلى إكتساب أجر صلة الرحم وأجر التقرب إلى الله بنبذ العداوة والتسابق المحمود لكسب العفو برفع شعار وخيرهم الذى يبدأ بالسلام . فكلمة العفو فى هذا اليوم المبارك هى أجمل الكلمات التى تخرج صافية من القلب إلى القلب مباشرة وتهدأ النفوس ويعود الإنسان إنساناً كما كان وكما يجب أن يكون.
وفوق أجر صلة الرحم وفضيلة العفو وتبسمك فى وجه أخيك نجد الكل يفتح داره ويمد موائده لمزيد من الأجر ولكن يجد الجميع أن عمنا المرحوم طيب الذكر الأمين الصديق قد أشبع كل الناس فى إفطاره المميز ومازال يطمع فى المزيد.
فنسأل الله له الرحمة والمغفرة وأن يجزيه وأسرته خيراً عن لقمة طيبة أكرمونا بها.

علي الامين

07-16-2009, 06:03 AM

مشكورين الاخوان بكري و الطيب و خضر ولكم مني الف تحية وسلام . أنا لا أذكر من العيد غير فطور الصباح الذي درج عليه والدنا رحمة الله عليه . والوالدة أمد الله في أيامها و الاخوان و الاخوات إضافة لابن عمتنا محمد عبد العزيز جزاهم الله ألف خير عازمون على أن يظل هذا الامر على الدوام . من ذكرياتي أنني اول مرة يأتي على العيد وأنا بعيد عن الجريف كان عام 88 ، حيث كنت في مامورية في مدينة كسلا ، طبعا بعد ما قاموا بالواجب أتى وقت ذبح الاضحية لحظتها إكتشفوا أني غير موجود فأخذ الجميع في البكاء . قلبّت علينا المواجع يا أستاذ بكري ، لي عشرة سنوات لم أحضر العيد في الجريف .

الجرافي

09-27-2009, 03:42 PM

مشكور كتير عمنا بكرى الطيب هدية

البوست فى قمة الروعة والوصف
ارفق ليكم بعض من الصورعشان يكون شكل العيد
بالصورة كمان

ياريت تورونا بالوصف الدقيق الناس الفي الصورة ديل منو

نحن متابعين معاكم ومتشوقين كتير

وليكم الصورة الاولى

http://www.up-00.com/s1files/5pm65197.jpg (http://www.up-00.com/)

الصورة الثانية

http://www.up-00.com/s1files/ylV65197.jpg (http://www.up-00.com/)

الصورة الثالثة

http://www.up-00.com/s1files/7Rz65197.jpg (http://www.up-00.com/)

الصورة الرابعة

http://www.up-00.com/s1files/0CP65697.jpg (http://www.up-00.com/)

الصورة الخامسة

http://www.up-00.com/s1files/YXY65697.jpg (http://www.up-00.com/)

الصورة السادسة

http://www.up-00.com/s1files/CzC65697.jpg (http://www.up-00.com/)

وباقي الصور بعد مانشوف الحاصل شنو فى ديل

ولينا عوده

عادل مختار الزين

09-27-2009, 07:00 PM

الأخ بكري وبقية الأخوة المتداخلين

لكم التحية على ما أتحفتمونا به من ذكريات جميلة وطبعاً من أجمل الذكريات التي تمر على المرء هي ذكريات أيام العيد وما يصاحبها من أحداث ، ولهذه الذكريات طعم خاص خاصة لنا نحن في بلد الغربة ( والله قلنا الروب عديييييل )
عيدنا في كركوج طبعاً يختلف عن كل أعياد المناطق الأخرى لأنه يمتاز بالإضافة لما ذكره الأخوة السابقون من تلاقي وتصافح وضرب للنوبة بإيدي محترفين على رأسهم المرحوم عمر ود الزبير ( البعيو ).
في عيد كركوج عندنا حاجة كانت ضرورية ومهمة ومن أجلها كنا ندخل في العلب ( الصناديق) قبل العيد بشهور عشان نلم القروش عشان نمشي ود أبوعمارة بالكارو والما مشى ود أبوعمارة ما عيد ، والميزة التانية في عيد كركوج هناك عيدين وبمعنى آخر نوبتين ، نوبة الناس الصايمين مع الدولة وتنطلق من جامع الفكي خليل بالحضارة وعادة تكون في اليوم الأول ونوبة الناس الصايمين مع الشهر ( ناس رؤية العين ) وتنطلق من جامع الحوش ودائماً تكون اليوم الثاني .ولكل طعمها الخاص لكن نوبة جامع الحوش بصراحة كانت قوية وحااااارة وطبعاً نحن تابعين للحوش ، بعد داك تفطر في الجوامع الإتنين وبي قروشك تمشي تشتري من المرحوم عمر ودالزبير ( البعيو ) لأنه كان بعد ما يخلص من النوبة عندو فطور كارب شندوتشات ونقعد نلعب في الطوطوحات ( المراجيع ) وتأجير العجلات ولو ما عندك قروش لتأجير العجلات تنتظر أخوك أو صاحبك في نص الطريق بعد ما يأجر وتقول ليهو أديني (سحبه) ويستمر الحال لأيام العيد الأربع من الصباح وحتى قريب المغرب لتنتهي أيام العيد ومعها اللحظات الجميله لنبدأ الإنتظار ولم القروش للعيد القادم.

بكرى الطيب هدية

09-27-2009, 09:09 PM

الجرافي ود أخوي يديك العافية يا ضراعي ما قصرت
ويا دوب ذقنا طعم حلاوة العيد بصورك الجميلة الرائعة بس صدقني غير محمد الفكي الطيب في الصورة رقم (5) ما عرفت زول يكون الكبر ده عمانا ولحقنا ناس عصام عبد الصادق ولا شنو

خضر حسن الفضل

09-27-2009, 10:40 PM

سلام ياأستاذ بكرى
مولانا محمد الفكي الطيب موجود فى الصورة 2 والصورة 3
أما في الصورة رقم 4 فتجد عمك حاج أحمدعبد الرحيم جالس على كرسي فى الصف الأول
ولى معهم ذكريات فمولانا محمد الفكي الطيب فكنت الوحيد المسموح لي أتكلم معاه بالإنجليزى حتى داخل الجامع لأنه زمان كان هو متطوع بأن يشرح لي الإنجليزي.
أما العم حاج أحمد عبد الرحيم كان مرة واقف في محطة 13 وأنا سائق ماشي على الجريف وافتكرته ماشي للمحس كترانج كعادته فرفعت له يدي بالسلام ومشيت . وبعد كم يوم تقابلنا وسألته عن أخبار العم والخال ميرغني عبد الرحيم بكترانج فقال لي أنه لم يذهب لكترانج في ذلك اليوم بل كان راجع للجريف وانه زعلان مني عشان ما وقفت ليه ... فأبديت الإعتذار والأسف فقال لي أنه سوف يقبل إعتذاري ولكنه لن يعفوا عني الآن وكلما اصادفه أطلب عفوه فيقول لي باسماً المرة الجاية... وهنا اطلب من ابن أخته الجنرال حاج علي المنشاري بأن يبلغه تحياتي وأن يحضر لي منه العفو موثق ومعتمد. فلهم ولكل من شملته هذ الصور أجمل التحايا
والشكر أجزله للأستاذ بكرى الطيب والأستاذ الجرافي علي هذه الساحة الجميلة في ماضي ووادي الذكريــــــــــــات.
وعيدكم مبارك

خضر حسن الفضل

09-27-2009, 11:40 PM

الأخ عادل سلامات
بختكم ضاربين عيدين في برنامج واحد لكن انا ماعرفت ابو عمارة دى
في عيد كركوج عندنا حاجة كانت ضرورية ومهمة ومن أجلها كنا ندخل في العلب ( الصناديق) قبل العيد بشهور عشان نلم القروش عشان نمشي ود أبوعمارة بالكارو والما مشى ود أبوعمارة ما عيد

عادل مختار الزين

09-28-2009, 08:33 AM

الأستاذ الفاضل الخضر

ود أبو عمارة دي نسبة للشيخ يعقوب ود محمد مجلي وأمه فايه بت عمارة دنقس بقولوا مدفون في منطقة تقع في بداية الجريف علي الجدول. والجرافة سموه ود أبوعماره عشان أمو بت عمارة دنقس وأصبح مزارة ،وفي زمنا مافي شافع كركاجي ما شافها لكن شفع الزمن ده ما عارف شافوها ولا لا .

حافظ العبيد الطاهر

09-28-2009, 08:45 AM

بكرى وكل الاخوة المتداخلون لكم التحية والاحترام طبعا رجعتونا الى الزمن الجميل زمن العيد وصلاة العيد وكارو عادل وود ابو عمارة والجدول والكابيتا والنوبة والزكر .
طبعا كل هذه الاشياء اليوم نحن اليها ونتمنى ان ترجع ايام زمان ، شكرا اخوانى لهذا الابداع وهذه الزكريات الجميلة ودمتم

بكرى الطيب هدية

09-28-2009, 09:11 AM

استاذ خضر
حبيبنا ود مختار
حبيبنا ود العبيد
تحياتي واشواقي
والحمد لله العيد جاب لينا ود العبيد بس يا عادل موضوع ود عماره ده لأول مرة اسمع عنه وهذه معلومة تاريخية مهمة جدا ويا ريت لو تفيدنا أكثر لأن معظم الناس يجهلون معنى التسمية ومن أين أتت ولك كل الشكر

البــ ع ــد الثالث

09-28-2009, 11:16 AM

أتذكرتك.....انا
فى يوم غمام ساقنى الهيام
لزمن رجوع ناسى القدام

أتذكرتك .....أنا
بسمة فى خديك
سحابة فى عينيك
راحلة لارض الجروف
ناسيه ناسا حنا
هجره المكان
شد السروج
قصدهم سحابة فى عينيك

أتذكرتك ........أنا
رغم المسافة البشهده
جاتنى منك بسمة حانه
وهمسه عدت تحكى حالنا
عن زمن مره فينا
وبنسى انك كنت لينا

أتذكرتك .... أنا

الاستاذ : بكرى الطيب هدية
تحية وعيديه خاصة لك ولمن حولك

ولك عبق الذكريات من قلبى حلما اتمنى
ان يثاورك كل مساء
حلم تحكية كل صباح لمن تصطفيه
من عباد الله الصالحين .
القصد .......(من أحببتهم)

وكل عام وأنتم بخير
وعيـــد ســــ ع ــــيد

الجرافي

09-28-2009, 11:50 AM

تسلم وتشكر كتير عمي / بكرى الطيب هدية

أها ليكم كمان باقي من الصور أن شاء الله شكل العيد فى جامع الشيخ سرحان كلو بيكون فى البوست هنا عشان الطول من العيد فى الجريف يشوف بعيونه والعيد الجاى يكون فى الصفوف الامامية

قبل باقى الصور النحاول اتذكر ليكم فى الناس ديل

الصورة الاولى

شكل صفوف المصلين من بيعد الصف من حيى سرحان تقريباً ونت ماشى لحدي كركوج

الصورة الثانية

ديل ناس النوبة وهم جاين متحركين من مسجد الشيخ سرحان لساحة المصلى والله نصهم بعرفم لكن الزمن طول علينا

الصورة الثالثة

التقول الشايل الطار داك حسن ود عباس كان زميلى فى الدراسة بمدرسة سعد بن وقاص فى الابتدائية

الصورة الرابع

القاعد اول زول فى الصف ده معتصم السر

الصورة الخامسة

المشايخ ديل ساكنين قدام قريب الظلط

الصورة السادسة

الفى الصورة ده أستاذي الجليل الفاضل

الاستاذ /ضمرة محمد الخضر

وقدام منو أبن مؤايد على مااعتقد والشايل الكرسى هناك داك

الأخ الدكتور/ الطيب عمر

ليكم بعض من الصور كمان

ولينا عوده

الجرافي

09-28-2009, 12:04 PM

السابه

http://www.up-00.com/s1files/n3m38857.jpg (http://www.up-00.com/)

الثامنه

http://www.up-00.com/s1files/FSh38857.jpg (http://www.up-00.com/)

التاسعة

http://www.up-00.com/s1files/UI438859.jpg (http://www.up-00.com/)

العاشره

http://www.up-00.com/s1files/dDh39083.jpg (http://www.up-00.com/)

الحادية عشر

http://www.up-00.com/s1files/oJq39083.jpg (http://www.up-00.com/)

الثانية عشر

http://www.up-00.com/s1files/zNC39101.jpg (http://www.up-00.com/)

الثالثة عشر

http://www.up-00.com/s1files/KAq39101.jpg (http://www.up-00.com/)

النعرف الناس ديل منو ونرفع ليكم باقي الصور

بكرى الطيب هدية

09-28-2009, 05:09 PM

حبيبنا الغالي البعد الثالث
هــــــــديتك مقبولة بأذن الله ومشكر وربنا يحقق كل امنياتك
هذه هدية اعتز بها كثيرا وستظل ذكراها ما حييت
وللذكر خلود
وللخلود وجود
وللوجود حياة
وللحياة أمل
وللأمل صديق
فيا نعم الصديق

بكرى الطيب هدية

09-28-2009, 05:34 PM

ود أخوي الجرافي الأصيل ود الأصول
أن شاء الله يوم شكرك ما يجيء
ودمت سندا ومنعة وأملا لجريفنا الحبيب وربنا يعدل خطوتك ويعلي مراتبك ويحقق مرادك ويكفيك شرّ أولاد الحرام ويحفظك من كل سوء وتأكد هذه دعواتي لك في كل صلاة

حسن

09-28-2009, 06:50 PM

والله قلبتوا علينا المواجع يااستاذ بكري الطيب هديه
الاخوه الاعزاء والزوار الكرام للعيد في الجريف طعم خاص جدا ونكهه مميزه كما ذكر الاخوان وخاصا الاخ عادل مختار بزيارة ابوعماره
لكم التحيه لما نثرتوا لنا من ذكريات جميله ورائعه
وعيدكم مبارك

بكرى الطيب هدية

09-29-2009, 07:13 PM

الحسن أخوي كيف حالك إن شاء الله طيب وعيدك مبارك وربنا يعيدك لي أهلك وأحبابك سالم وغانم وتروي ظمأ السنين المرة في أرض الغربة وتسعد بحلاوة اللقيا وسط أصحابك وخلانك وتكتب لينا بدل المواجع وتقلباتها عن السعادة وطعمها
ولك أصدق التحايا

حافظ العبيد الطاهر

09-30-2009, 10:47 AM

اخى بكرى وكل الاخوة الاعزاء لعل اخونا عادل قد ذكر ود ابو عمارة فى هذا البوست واتضح ان
معظم المشاركين لم يعرفوا ود ابو عمارة ، وكان لزام علينا ان نوضح ود ابو عمارة ، اخوانى
طبعا نحن نعرف ان معظم اهالى الجريف هم مشايخة بكرية وينتمون الى نسب سيدنا ابو بكر الصديق
وقد وفد الى منطقة الخرطوم جدنا الشيخ محمد مجلى من اليمن السعيد من منطقة صغيرة تدعى بندة
وقد استقر به الحال فى منطقة الخرطوم وهم يعتبرون من مؤسسين منطقة الخرطوم والحلفاية وللحلفاية
قصة اخرى سوف نذكرها وقد تزوج جدنا محمد مجلى ابنة عمارة دنقس ملك العنج مؤسس الدولة
الاسلامية الاولى والاكبر فى السودان وقد انجب ابن اطلق عليه يعقوب محمد مجلى ولقب بود عمارة
ودفن فى الجريف وقد كانت عادة جدودنا انهم كانوا يزورونه فى الاعياد ونحن وجدنا هذه العادة
وقد استمرننا فيها . اما امه هى فاية وقد اطلق اسم الحلفاية عليها وهى حلة فاية .
على حسب كلام ود ضيف الله وتحقيق عون شريف قاسم . ويعتبر الشيخان حمد وخوجلى هم من
احفاده ولكن هؤلاء الشيوخ نسبوا الى والدتهم المحسية مع العلم بأن اباهم مشايخى من نسبنا .
وكانوا هؤلاء شيوخ العلم فى السودان ويرجع اليهم الفضل فى نشر العلوم الدينية فى السودان
كما يرجع لهم الفضل فى تأسيس الدولة الاسلامية وقد نزح جزء منهم الى منطقة سنار لنشر الدين
وتأسيس الدولة الاسلامية مع عمارة دنقس ولذلك نجد ان معظم شرق سنار هم مشايخة واكبر دليل
على هذا هو احياء المشايخة فى سنار وديم مشايخة خير شاهد على هذا .
بمعنى ان القبر هذا هو قبر جدنا الكبير من الام السودانية ، وانشاء سوف نرجع الى هذا الموضوع
فى بوست العائلة وكانت هذه اجابة بسيطة من تساؤلات استاذنا خضر واستاذى بكرى .
ودمتم

عادل مختار الزين

09-30-2009, 09:34 PM

الشكر أجزله للأخ حافظ عبيد فقد أوفى وكفى في هذا الشرح وأنا بصراحة لم تكن معلوماتي كافية عن هذا التاريخ وكل معلوماتي حاولت أن أسردها في مداخلتي السابقة ، وحاولت الإستعانة ببعض من لهم دراية عن موضوع ود أبو عمارة لتكتمل الصورة لكن الحمد لله الله نجدني بالحبوبة حافظ فله خالص الشكر .

الحاج الرشيد حسب النبى

10-06-2009, 09:07 AM

استازى العزيز بكرى الطيب ا شكرك الشكرالجميل على هذه الموضوع اللذى نحن فى اشد الشوق الى هذه المعايدات وصلة الرحم اللتى نفتقدة فى الغربه اللعينه اللتى نتمنى من الله انا يقصر من ايامه لكى نعود ونحتفل معا اهلنا بالمناسبات الجميله والاخ الجرافى ياخى اقول ليك شنو وانت الوحيد اللذى جعل الدموع تخرج من عينى بعد انا راينا الصور وشفنه اهلنا ومنهم شيخنا الله يطول فى عمره (الشيخ الحاج ابراهيم ) الجرافى بالله كتر من صورك

العيد الجاب الناس لينا ما جابك
(القلعه راجعين)

بكرى الطيب هدية

10-06-2009, 09:56 AM

ود القلعة والرشيد والجريف حبيبنا الغالي
الحاج
تحياتي واشواقي
ومرحبا بك وعيدك مبارك وخليك معنا دائما
ولك اجمل الاشواق

الطيب حسن الفاروق

10-06-2009, 02:39 PM

الاخ والصديق بكرى
اهنئك بالعيد السعيد ولعلك تذكر ذكريات الصبا وفريق العاصفه والايام الجميلة التى قضينها فى حلة سرحان واهلها الطيبين وكرمهم الفياض وحسن
استقبالهم
.والصور التى شاهدتها اثارت الشجون والايام الخوالى .التحية لك ولكل رفاق الدرب ولكل اهلنا فى الجريف
وكل سنة وانتم تامين ولامين

بكرى الطيب هدية

10-06-2009, 04:08 PM

الأخ العزيز الغالي ود الفاروق
عيد سعيد وكل عام وانت بألف خير
طبعا يا ود الفاروق هذه ذكريات لا تنسى وخاصة تلك الفترة التي مثلها جيلكم فقد كانت من اروع الفترات فكانت بها مجموعة كبيرة من النجوم التي اضاءت سماءنا وعطرت تاريخ العاصفة بأروع الإنتصارات
وستظل ذكراها على مر العصور والاجيال
وكل عيد وايامك سعيدة

الجرافي

10-09-2009, 05:32 PM

سلام عليكم ياجماعة عمي بكري الطيب عساك شديد وطيب

أنا جايكم اواصل باقى الذكرة بتاعتي لشكل العيد فى جامع ابونا الشيخ سرحان

معليش كنت بعيد شوية وشريط ذكرياتي مشول بعمل مفروض اعملو من زمن بعيد ان شاءالله يراى النور قريب وانا شايف الناس هناك ناس ود العبيد وباقى الجماعة بيتكلمو عن ود أبو عمارة وكلام عجيب خلاص

خليكم قريب وماتبعدو الجاى دراب كبار كبار وكلام عجيب

أخوي ود عمي الرشيد عساك بخير والله مشتاقين كتير ياالحاج

المحبة شدية والمسافة بعيد وغير الصور مافي لينا طريقة اها انا جايك بباقي الصور

لينا عوده

بكرى الطيب هدية

10-09-2009, 07:12 PM

الأخوان حافظ العبيد والجرافي
لكم خالص التحايا
وطبــــــــــــعا يا ود العبيد اتحفتنا بتلك المعلومات القيمة عن وادي ابو عمارة وجزاك الله عنا ألف خير وما زلنا نريد منك المزيد لآن الموضوع له ابعاد تاريخية هامة لها علاقة بأهل المنطقة
ود أخوي الجرافي ما تطول علينا وركز على المواقع التي تعتبر اماكن أو معالم مهمة في خارطة الجريف الجقرافية خاصة شكل الجريف العام بدءت تتغير ملامحه وربما يأتي علينا يوم لا نجد من تلك المعالم إلاّ الذكريات

الهندي بشير نابري

05-03-2010, 07:50 AM

up
up
up
up
up

up
up
up
up
up

وليد عثمان علي سنقد

05-04-2010, 12:23 PM