عرِّس الليلة و ادفع بكرة

[صديق النعمة الطيب]

تزوج اليوم و ادفع غداً
جاء في جريدة الشرق القطرية بتاريخ: 15/06/2009م
(في واحدة من أكثر القصص الاجتماعية مأسوية و إثارة للجدل و للتناقضات تعرض مواطن للسجن على يد أم زوجته ففي الوقت الذي حرصت خلاله الأم على ضمان مستقبل ابنتها كانت السبب بالدفع بها إلى أسوأ حالات العوز و الفاقة حتى باتت لا تجد مأوى يضمها و طفلها بعد أن هجرت بيت أهلها الذي كانت تسكن فيه جراء تأزم الموقف بينها و بين أسرتها التي كانت سبباً في سجن زوجها باستخدام شيك كان الزوج قد حرره كمهرٍ لها...........)

أخوانا العزاب، و ليس المقام مقام ذكرهم بالأسماء فالعزاب أعلام نسمع أنينهم و نحس عذاباتهم و تحبطنا تأوهاتهم المتكررة "عمال على بطال" حتى أصبحنا نتجنب الحديث معهم على انفراد أو الذهاب إليهم في السهرات، الشغلانة بقى فيها زواج بالشيكات الآجلة يا أهل الله يا ناس هناي و هناي، يعني احصل على متعة الزواج اليوم و ادفع بكره و لا تفوتك الفرصة، و انت و حظك مع أم العروس، لذلك تخيروا أم العروس الودود الهادية و رضية قبل العروس، و كل ما كان سكن أم العروس و شبكة علاقاتها بعيده من الشوارع و التجمعات و المولات التجارية، و بعيده من الدلاليِّات و مجادلة تجار العدة، كلما زادت امكانية فض النزاع بالتسوية الحبية بعيداً عن غياهب السجون، و ربما تحصل على بعض الخصم،،،،
يا ناس فطور العريس هوووووي، ما عليك إلا أن تفتح حساب في البنك و تحصل على دفتر شيكات و في خلال أسبوع فقط تكون داخل القفص الذهبي تتمتع بكل مزايا العريس و ذبح الكديس و نفض الكيس و النوم الهانئ بدون كوابيس و تأمر فتطاع و من بعدها مباشرة إلى قفص آخر و لكن لا يهم المهم أنك قد حققت الحلم،،،

[معذ السماني الحاج ياسين]

الاخ الرايع صديق النعمه التحيه لك
ياخي مالك علينا الناس بتحاول تحلحل
المشاكل الصغيره الناتجه من (عرس الايامات دي )
وانته جبتها لينا كبيره (سجن عديل ) الله يستر
الناس كان بتحاول تعالج (فطور العريس والشيله والمهر والهدايا )
وغيره من الظواهر الغريبه التي ظهرت علي الاعراس في الفتره
الاخيره لكن شكلوا الموضوع كل يوم ماشي في اصعب
ولنا عوده
معز السماني

[ايمن السر بابكر]

دى القدرتى عليها يا اخوى
وين النصائح وين تزوجو فقراء
رجفتنا شديد شيكات دى ما فينا
من لا يملك شيكو لايملك قرارو

[خضر حسن الفضل]

شكراً يا أستاذ صديق
الموضوع بالرغم من انه مُحزن إلا أنك سردته فى قالب ساخر أضحكنى كثيراً وبالطبع لك الحق فى أن تسخر من موقف أسرة الزوجة ومن الزوج نفسه والذى إبتكر حكاية الدفع المؤجل للمهر وليس لمؤخر الصداق بالرغم من ان راى الدين واضح فى هذه المسألة.
ومن ناحية تجارية أعجبنى الإعلان الذى أطلقته وكدى شوفى لينا معاك كم شوفة شيكية كدى مش عشان ُعزاب المنتدى فكفاية الخوفة التى دخلت فى ولدنا مُعذ وولدنا أيمن والذى أطلق قولته الذهبية المعبرة عن حال زماننا هذا { من لا يملك شيكه لا يملك قراره} وديل خليهم محلك سر ومتابعين الشوفة الشرعية العبدلاوية النابراوية.
لكن الشوفة الشيكية محجوزة لكبار الرأسمالية الوطنية بالمنتدى أمثال السناتور عصام وأبو تراجى والملياردير يحيى عثمان و الثنائي بدر والطيب بخيت والسفير أبو مصعب الحمزاوى والذى هدد جميع العُزاب بانه جاهز لتعزيز التأهيل.
أما فطور العريس بالشيكات هههههههههههههههههه أعتقد انه حيكون عسير الهضم وقد ذكرنى بموقف محرج حدث لى وأنا طالب حيث ذهبت لمطعم فى بحرى وكعادتى راجعت فلوسى لكى أحدد أعلى مستوى غذائي يسمح به الجيب وبكل أسى وجدت نفسى فى مستوى ما دون موية الفول يعنى لا سبيل للدخول وقبل ان أرجع قابلنى احد المعارف وقالى هل فطرت فقلت له لا فعزمنى للفطور واكلنا ما طاب وما إستطاب وفى النهاية امرنى بسرعة الخروج من باب خلفى لأنه أيضاً لا يملك شئ !!!

[حسن]

استاذنا صديق النعمه اسعد الله اوقاتك
دا زواج العصر والسرعه يعني النسيبه قبل العروس دي جديده ومانستبعد لو البنوك تتبنى هذا الزواج وتعمل ليه كرت ماسترفيزا للزواج وعلى الاخوه العزاب بالمسارعه باخذا هذه البطاقه وتاخي الحيطه والحزر من ام العروس ... وتاني الناس مابتسال عن العريس في شخصوا بقدر مايسالوا كدي شوفوا شيكوا كاشف ومليان والحمدلله على كل حال
تحياتي

[saida sopahi]

والله فكره على الاقل تتفك البوره شويه والبنات يهمدن شويه من الحاله الهم فيها دى وبعد كدا الواحد وحنكو مع ام العروس والعروس زاتها ياقدر رجع شيكاتو دى من ام العروس يادبلوها ليه فى السمايه بشيكات جديده هو وحظو (((( لو الام لو بنتها عايزين الكلمه الحنينه والرقه فى المعامله لانو الحنيه فى ازمه اليومين ديل .....والدخل السجن دا بيكون افترى واعتبرها بيعه رخصه وطول لسانو عشان كدا دا اقل حافز ليه عشان البقيه تتعظ ))))) يا اخوانا الحريم ديل مهما يعملو فى النهايه هم عايذين الستره وربنا يسترنا جميعا

[صديق النعمة الطيب]

يا معز يا خوي قول الرووووب ساي،جرستك دي لا أنا و لا موضوعي داخلين فيها، الرجفه ماسكاك من أول ما ترمي فيني خوفك، و بعدين شايف الفكرة راقت ليك لحدي ما وصلتك السجن، يا خوي دق سدرك و السجن "للجدعان"،،،
أيمن السر، رجفة شنو يا خوي، آخر مره فحصت الملاريا متين،
أستاذنا الخضر خايف أشوف ليك شوفه شيكية بعدين تقول لي شكيتك فوق الله، و لو المطعم فيهو باب خلفي، الشيكات بابه واااااحد، و بعدين ناس عبد الله و الهندي ديل صدقني بحاولوا يعملو نماذج و هم قاصدين حكايه العزوبية دي عشان يثبتوا للناس قساوته و ينفروا الشباب من العزوبية، ما شايف براك عبد الله يجي المنتدى و يبهج الجميع و بعد يومين و بدون أي مقدمات يغيب و ما معروف بمشي وين حتى الهندي قال الزول دا بقى يخوف عديل كده تصرفاتو بقت غريبة، و الهندي أنا شاكي إنو صلعتو دي بمعِّطه براهو بدون ما يحس و الله يكون في عونو أنا غايتو عاذرو الشغلانة ما ساهلة،،
أخونا حسن، و الله حكاية الماستركارد دي احتمال تكون شوية أحسن من الشيكات، علي الأقل الواحد ممكن يقول و الله أنا ما كنت عارف "الفوائد" و ما بدفع لأنو ربا و أنا ما بتعامل بالربا و الناس ممكن تتعاطف معاهو شوية،،،
و الله يا سيدة قصة تدبيل الشيكات للسماية دي بالغتي فيها، يعني الشغلانة ممكن تجر كم سنة كده، كل ما يتم أجل الشيكات نغير القيمة بزياده و نأجل التاريخ شويه، و لو القصة واصلت ممكن الأولاد بعدين يسددوا دين أبوهم، المشكلة الأولاد حايكونو بين نارين شيكات أبوهم و شيكات أم زوجاتم، يعني بدل ما الناس كانت بتتكاتل علي التركة و الورثة ما عارف الحكاية حا تكون كيف،،،،
و السؤال المحير،،،
هل الولد ملزم بسداد شيكات زواج أمو و لا الحاصل شنو يا جماعة أفتونا،،،،

[معذ السماني الحاج ياسين]

[QUOTE=صديق النعمة الطيب;2112][size="5"][color="darkred"]يا معز يا خوي قول الرووووب ساي،جرستك دي لا أنا و لا موضوعي داخلين فيها، الرجفه ماسكاك من أول ما ترمي فيني خوفك، و بعدين شايف الفكرة راقت ليك لحدي ما وصلتك السجن، يا خوي دق سدرك و السجن "للجدعان"،،،


صديق النعمه التحيه لك
والله وانا اقراء هذه الكلمات ضحكت
من اعماقي
اما بخصوص دق (السدر )
وكده
نحنا لاقين السدر عشان ندقوا ونكون مع
الجدعان
ولينا عوده
معز السماني