عادل مختار الزين
06-12-2009, 04:33 PM
صحيح أن من الحب ما قتل ، وتتجسد هذه المقولة في هذه القصيدة التي تحكي نفسها بنفسها ونسبة لعدم إمكانية حذف أي من بيوتها حتى لا يخل بالمعنى فأنا أسردها لكم كما هي برغم طولها لأنها إستوقفتني كثيراً لما تحمله من معاني وتضحيات إفتقدناها كثيراً في زماننا هذا والقصيدة هي :
نعمه كانت ياحليله شالوها ما بين يوم وليله
سوو العرس جابوها شيلة شبينا قمنا على الفضيله
ونعمه كانت يوم داك صغيره تجري وبتلعب في شليله
ولمن يطول الطين هدومه أم نعمه تتعب في غسيله
ولما نتعب من مقيل الحله وأشجاره الضليله
أجري أطلع في نخيله أرمي ليها التمره غضه تقوم تشيله
وتاني أقطع وأرمي ليها وهي تشيل ملت إيديها
وكان تعاين لي تنادي عشان أنزل أجيها
أقول ليها بس فاضل سبيطه تقول لي ببكي وكنت ما بحمل بكيها
ونجري على الحله شايلين بلحنا في طرفنا
أم نعمه كان مرات بتزعل شايله سوط الحنه جايا علينا نحن
وأمسك إيدا وأقوم ألاوي يا خالتي لا ما تدقي نعمه ، نعمه ما غلطانه دقيني أنا ما دقي نعمه
وأم نعمه تزعل لي زعلنا ونقعد نلقط في بلحنا وتتجدد الفرحة بي ضحكنا
*********وعددت السنوات وكبرت نعمه يمه بتقرأ في سنه أولى نعمه
لابسه أخضر وبالضفاير حلاته نعمه
أول أسبوع نعمه غابت قالت إنو فصلنا زحمه
وكنت في خامسه إبتدائي ونعمه في سنه أولى دابه
كل ما صبحاً أطل أغشاها دايماً أوصلها حتين أصل
وأمي كان تحشي الفطور مره روب ومرات عسل
البينا عامره مافيش زعل*********
حصتنا كانت التالته دين بدينا ليها أستاذ عمر حاج اللمين وآخد الإذن
أستاذ عمر يقول لي تعال هنا ياولد ماشي وين ؟
وفصلنا يبدأ الهرجله وأستاذ عمر ينهر سكوت
شوف يا ولد ممكن أنا أخليك تفوت
بس إنت قول لي ماشي وين
ياأستاذ عمر ، ما نعمه فكوها البيوت بتخاف براها من الدرب بتخاف إعضيها الكلب
حا أوصله والحصه أرجع أحصله وآخد الإذن*************
وعددت السنوات وكبرت نعمه يمه بتقرأ في سنه تانية عالي
نعمه قمراً وضي يلالي فارعه زي البان تنادي ضفيره ترفعها تجري غادي
نعمه كان عيدي عيدا لما تضحك فوقي كان النار تقيدا
ولما تتقابل عيونا كان تخت في عينها إيدا وبالخجل يحمر خديدا
وكنت بسرح في المقدر والقدر اللي مسطر
ومن ضحكه أصبح وشي كشر
تقول لي مالك أقول ليها نعمه خوفي الزمن يفرق جمعنا
ويقصدنا نحن في سمحنا
أشوف في خدوده الدمعه تجري
تقولي لي إنت عارف إنت دخري لو قالوا غيرك بنهي عمري
يلا بس إتخرج إنت وجيب شهادتك إنت محري
وكنت بمسح في دموعه والخدود يضون شموعه
وكان بتكتب لي ترسل وتحكي عن أحوالها ديمه
وعن أملنا القرب يحصل وتختم الجواب توصي
جيب شهادتك يلا عجل ما إنت زادي الما بدور نقصانو يحصل
وكنت بنجح ، ولما أنجح نعمه تفرح
كنت بنجح عشان هي تفرح**********
وآخر شهر والإمتحان وبعدو التخرج يا زمان
فيهو الشهادة الكنت راجيها من زمان عشان أمشي لي ست الحسان
اللمه والزين والعديل وعرسنا بالموجود نشيل
تعمر قلوب توسع ديار وتسع أحبابنا لقبيل
وفي شهري داك أنا كنت ماسك لي كتاب
قدامي صورة نعمه شايله زي حجاب
قالوا لي بختك جاك جواب
وبعد ما خلصت من القرايه وناموا كل الكان معايا
فتحت جوابي الحدايا
من نعمه كان ، نعمه بتقول لي تعال بسراع وسيب الإمتحان
وأوعى تتأخر كمان عشان ما أضيع ويكون خلاص الكان هو كان*********
ليلي العلي ليلين الساعه دوبه إتنين لمتين شروقو يحين
ولمن صباحو شرق ما أغمضت عينين
وركبت في باص البلد حلمان أكيد ما يكون ده جد
والباص ضرب لستك كمان وقعدنا يومين في الطريق ونقول يا رب مدد
وصلنا الخميس وكنا قايمين يوم الأحد
تاريهو أبوها للمادة سلم أدى كلمه ولي شنبو برم
ونعمه قالت لا ما بعرسو لو يقع دم
ولو أنتحر يكون لي أرحم
حلف طلاق وفي بنيتو أقسم قلت طلق نعمه تنضم
أمها علي من هسع تحرم وبقت نعمه بين نارين جهنم
حكم أبوها بأنو نعمه يعرسوها
يوم جيت كان ذاته الليله جوها
وفي السباته وقفوها وقالوا ترقص
كيف بترقص والدموع ملت إيديها؟
كيف بترقص والقمر حتى القمر حزنان عليها؟
كيف بترقص والنجوم الكان بتشهد حبي ليها ؟
الليلة وينك يا النجوم سماك شنو الحاصل عليها؟**************
نعمه وقفت زي عروس النيل قبل ما يرسلوها
وأبوها قال طلق نعمه لازم يرقصوها
ونعمه رفعت عينها وعيني وقعت في عينيها
ونزلت دموع ملت خديهاا
كأنو ديك الحنة دم خضب إيديها
ونعمه وقفت دايره ترقص ودقوا ليها
ونعمه رقصت زي التقول جد ما عليها
نعمه تعرض بالسف تهز حزنان وشيها
ودعت كل الحضور وضمت إيديها
والسيف دستو في صديره النعمه يا ناس ألحقوها
النعمه فاتت قبل ما ينضاك حلوها
نعمه كانت ياحليله شالوها ما بين يوم وليله
سوو العرس جابوها شيلة شبينا قمنا على الفضيله
ونعمه كانت يوم داك صغيره تجري وبتلعب في شليله
ولمن يطول الطين هدومه أم نعمه تتعب في غسيله
ولما نتعب من مقيل الحله وأشجاره الضليله
أجري أطلع في نخيله أرمي ليها التمره غضه تقوم تشيله
وتاني أقطع وأرمي ليها وهي تشيل ملت إيديها
وكان تعاين لي تنادي عشان أنزل أجيها
أقول ليها بس فاضل سبيطه تقول لي ببكي وكنت ما بحمل بكيها
ونجري على الحله شايلين بلحنا في طرفنا
أم نعمه كان مرات بتزعل شايله سوط الحنه جايا علينا نحن
وأمسك إيدا وأقوم ألاوي يا خالتي لا ما تدقي نعمه ، نعمه ما غلطانه دقيني أنا ما دقي نعمه
وأم نعمه تزعل لي زعلنا ونقعد نلقط في بلحنا وتتجدد الفرحة بي ضحكنا
*********وعددت السنوات وكبرت نعمه يمه بتقرأ في سنه أولى نعمه
لابسه أخضر وبالضفاير حلاته نعمه
أول أسبوع نعمه غابت قالت إنو فصلنا زحمه
وكنت في خامسه إبتدائي ونعمه في سنه أولى دابه
كل ما صبحاً أطل أغشاها دايماً أوصلها حتين أصل
وأمي كان تحشي الفطور مره روب ومرات عسل
البينا عامره مافيش زعل*********
حصتنا كانت التالته دين بدينا ليها أستاذ عمر حاج اللمين وآخد الإذن
أستاذ عمر يقول لي تعال هنا ياولد ماشي وين ؟
وفصلنا يبدأ الهرجله وأستاذ عمر ينهر سكوت
شوف يا ولد ممكن أنا أخليك تفوت
بس إنت قول لي ماشي وين
ياأستاذ عمر ، ما نعمه فكوها البيوت بتخاف براها من الدرب بتخاف إعضيها الكلب
حا أوصله والحصه أرجع أحصله وآخد الإذن*************
وعددت السنوات وكبرت نعمه يمه بتقرأ في سنه تانية عالي
نعمه قمراً وضي يلالي فارعه زي البان تنادي ضفيره ترفعها تجري غادي
نعمه كان عيدي عيدا لما تضحك فوقي كان النار تقيدا
ولما تتقابل عيونا كان تخت في عينها إيدا وبالخجل يحمر خديدا
وكنت بسرح في المقدر والقدر اللي مسطر
ومن ضحكه أصبح وشي كشر
تقول لي مالك أقول ليها نعمه خوفي الزمن يفرق جمعنا
ويقصدنا نحن في سمحنا
أشوف في خدوده الدمعه تجري
تقولي لي إنت عارف إنت دخري لو قالوا غيرك بنهي عمري
يلا بس إتخرج إنت وجيب شهادتك إنت محري
وكنت بمسح في دموعه والخدود يضون شموعه
وكان بتكتب لي ترسل وتحكي عن أحوالها ديمه
وعن أملنا القرب يحصل وتختم الجواب توصي
جيب شهادتك يلا عجل ما إنت زادي الما بدور نقصانو يحصل
وكنت بنجح ، ولما أنجح نعمه تفرح
كنت بنجح عشان هي تفرح**********
وآخر شهر والإمتحان وبعدو التخرج يا زمان
فيهو الشهادة الكنت راجيها من زمان عشان أمشي لي ست الحسان
اللمه والزين والعديل وعرسنا بالموجود نشيل
تعمر قلوب توسع ديار وتسع أحبابنا لقبيل
وفي شهري داك أنا كنت ماسك لي كتاب
قدامي صورة نعمه شايله زي حجاب
قالوا لي بختك جاك جواب
وبعد ما خلصت من القرايه وناموا كل الكان معايا
فتحت جوابي الحدايا
من نعمه كان ، نعمه بتقول لي تعال بسراع وسيب الإمتحان
وأوعى تتأخر كمان عشان ما أضيع ويكون خلاص الكان هو كان*********
ليلي العلي ليلين الساعه دوبه إتنين لمتين شروقو يحين
ولمن صباحو شرق ما أغمضت عينين
وركبت في باص البلد حلمان أكيد ما يكون ده جد
والباص ضرب لستك كمان وقعدنا يومين في الطريق ونقول يا رب مدد
وصلنا الخميس وكنا قايمين يوم الأحد
تاريهو أبوها للمادة سلم أدى كلمه ولي شنبو برم
ونعمه قالت لا ما بعرسو لو يقع دم
ولو أنتحر يكون لي أرحم
حلف طلاق وفي بنيتو أقسم قلت طلق نعمه تنضم
أمها علي من هسع تحرم وبقت نعمه بين نارين جهنم
حكم أبوها بأنو نعمه يعرسوها
يوم جيت كان ذاته الليله جوها
وفي السباته وقفوها وقالوا ترقص
كيف بترقص والدموع ملت إيديها؟
كيف بترقص والقمر حتى القمر حزنان عليها؟
كيف بترقص والنجوم الكان بتشهد حبي ليها ؟
الليلة وينك يا النجوم سماك شنو الحاصل عليها؟**************
نعمه وقفت زي عروس النيل قبل ما يرسلوها
وأبوها قال طلق نعمه لازم يرقصوها
ونعمه رفعت عينها وعيني وقعت في عينيها
ونزلت دموع ملت خديهاا
كأنو ديك الحنة دم خضب إيديها
ونعمه وقفت دايره ترقص ودقوا ليها
ونعمه رقصت زي التقول جد ما عليها
نعمه تعرض بالسف تهز حزنان وشيها
ودعت كل الحضور وضمت إيديها
والسيف دستو في صديره النعمه يا ناس ألحقوها
النعمه فاتت قبل ما ينضاك حلوها