ابقي زي ماقلت ليك

[allarinja]

ابقي زي ماقلت ليك

كلمات الشاعر محمد خير درو

مبتسمه في الزمن الحزين
محضونه بي نور القمر لابسه العفاف في كل حين
أبقي زي ماقلت ليك
ماعندي ليك غير الهوي وطمبور موتر بالحنين
أطفيبو نيران الجوي وأكتبو أغاني المتعبين
كان يحلم البايت القوا بالعيشي مابين مترفين
يوماتي بحلم بي لقاك لكنو كيف ياحسرة وين
أبقي زي ماقلت ليك
معاكي بحلم زي طفل نبني الرواكيب والبيوت
أروتي فوق ساقية قصب أسقيلك أحلام جات موت
من غير ظنون وبلا شروط نسكن بيوت العنكبوت
وأحلامنا نديها البحر تخطفه الموجه وتفوت
أبقي زي ماقلت ليك
ضاري الهموم بي طرحتك لا تفضحي السر الدفين
لو تجدي دمعات العيون كانت بقت فتحاً مبين
لي ناس بتستلف الصبر من بكره كان تحيابو دين
تترجي زمناً مابيجي راجاهو أجيال من سنين
أبقي زي ماقلت ليك
إبتسمي بتونس معاك وأقيفي زي مالحال وقف
وريني فلسفة الحياة لي ناس بتفرح بالصدف
لي ناس يحبو ومعدمين يتمنو عيشه بلا كلف
تتحقق أحلامن متين لامن يكحلم الخرف
أبقي زي ماقلت ليك
يوم قلت أسرق ليك فرح لومني همسك بالعظات
قلتي لي أرجع وبي وراي تاكيتي باب الموبقات
يكفيني إنك مؤمنه مغسوله بي أنبل صفات
كل المصائب والمحن فاتحاله صدرك بي ثبات
أبقي زي ماقلت ليك
بتوشحك لون قوس قزح ساعة تصب أمطار بكاي
ياواقفه مابين الرموش زي غيمة من حزني وفاي
من شوقي ليك رغم البعاد سامع وصات همسك وراي
ضاريهو همك بالفرح انا ماني لاقي فرح معاي
أبقي زي ماقلت ليك
ماتكلميني عن الهوي عن قصة الحب التضيع
مابين مشاوير الحياة سندان زمن قاسي وفظيع
رغم إنو درسني الصبر وخرجني لافي بلا وجيع
أجيال من العالم وراي ركبت قطارات النجيع
أبقي زي ماقلت ليك
نمرق يوهدبنا الرزق لكنها الارزاق نصيب
نرجع نخاف شبح الظلام والوحشه والليل الرهيب
ونتلاقا تضحكي من بعيد في الكتمه ضحكك همبريب
عفوا حبيبتي كما الطيور عايشين كفاف زمناً عصيب
أبقي زي ماقلت ليك
انا عهدي بيك إنسانه أقوي من الظروف
شيل الجبال شلتي الهموم والفاضله لاقالو الكتوف
ما إنت ياقبلة غناي ساعة الاغاني عليك تطوف
وصيها ماترجع عبث تشلع منارات للبشوف
أبقي زي ماقلت ليك
ضوي لي من بسمك بروق أتحسس السكة الامان
يلاكي نمشي علي عجل نمرق من الزمن الهوان
نغسل نفوسنا من المطر ونتعافه من رجس الزمان
وألقاك ونتلاقا الفجر في دنيا تاني كما الجنان
أبقي زي ماقلت ليك
نغني نملا الدنيا ريد وننشره في العالم غمام
نمطربو للأطفال فرح نعزفلهم لحن السلام
نزرعلهم بين القلوب شتل الولف والإبتسام
مالدينا أروع ماتكون وكتين نعيشه بلا خصام
أبقي زي ماقلت ليك
ابقي زي ماقلت ليك مبتسمه في الزمن الحزين
محضونه بي نور القمر لابسه العفاف في كل حين
أبقي زي ماقلت ليك

[allarinja]

إخوتي للحلم وللواقع
لنقراء هذا النص الذي يماثل أحلامنا وواقعنا وحوجتنا بأن نكون ..
أبقي زي ماقلت ليك ..
لنتحاور كفرد وكمؤسسة وككوم واحد كبير ..
يلا ااا قول أبقي زي ماقلت ليك

[allarinja]

أبقي زي ماقلت ليك ..

أتبسمي ماتبقي رقراق أبقي ياضل ياشموس
غطي المساحات بالوضوح ..
كلنا نعترف أن هذا التوقيت من عمر هذا الزمان حزين
يحفنا نور الجريف في كل حين ولابسين توب العفاف من غير كلام
ساكتين راضيين بي عفة قلم وسترة حرف متغطي بي حشرجة المداد
ماذا عندك غير الحب والعشق ونبض قلبك واغنية بتدندنة من وتر طمبور حنين
ممكن يخفف نارك وتسرح بي خيالك تسكن مفردات الترف الجمالية ..
وكل يوم نفس الحال ..
ونواصل
ابقي زي ماقلت ليك

[allarinja]

أبقي زي ماقلت ليك
أسرح بخاطري لتكون البساطة في التواجد ..
وأمارس طفولتي هنا ,ابني أحلامي حين يكون القش والطين
بيوتاً تضم عشقي للمستقبل بلا رياء ..
هنا يكون هذا الأروتي الذ ي يشرف علي ثيران الساقية
ويصاحبة نوناي الساقية ويسقي مع الثيران أحلام
تغوص في باطن الأرض .

تخريمة شوايقة أحلامي دون الناس بصير للساقي ..

ويكون الرضاء هنا بالبقاء دون فرض إحساس الشك
أو توراد خواطر المعرفة المسبقة في بيوت العنكبوت
وبعد كل هذا الصدام العاطفي أحلامنا نديها البحر ..
وهنا يكون إختلاف الإحساس رضاء وقبول وهي لحظة
تغمض فيها عيناك لترمي في البحر كل ماتملك من تناحر
للذات المرهقة بعناء الفكر والإحساس وحينها تختف الموجة
كل ما في دواخلنا وتفوت
أبقي زي ماقلت ليك



أبقي زي ماقلت ليك

[عبدالرحيم حطي]

ويكون الرضاء هنا بالبقاء دون فرض إحساس الشك
أو توراد خواطر المعرفة المسبقة في بيوت العنكبوت
وبعد كل هذا الصدام العاطفي أحلامنا نديها البحر ..
وهنا يكون إختلاف الإحساس رضاء وقبول وهي لحظة
تغمض فيها عيناك لترمي في البحر كل ماتملك من تناحر
للذات المرهقة بعناء الفكر والإحساس وحينها تختف الموجة
كل ما في دواخلنا وتفوت
أبقي زي ماقلت ليك

زعيم الاحساس والمشاعر ( الامين الانسان )
سلام يازعيم
والله انت كاتب بارع ومبدع وربنا يوفقك ويحفظك
ونحن نستمتع بكلامك الرائع الجميل ( يا جميل ياحلو )
الامين دوم لنا بهذا القلم الرائع

[بكرى الطيب هدية]

اللارنــــــــــجـا عوافييييييييييي

ويبقى العشم :ـ
مادام الشمس ترسل ضوءها الذهبي الرائع الذي يغطي الأرض بجماله وروعته ومادام يوجد رجال يغارون على انتهاك المحارم , رجال هم كالجبال الشامخة التي أعييت أن يزحزحها أحد0
ويبقى العـشـم :ـ
عندما نستمد من الشمس الطاقة والحيوية ومن القمر الجمال والسحر ومن الصحراء الصبر والتحمل ومن الجبل الشموخ ومن الحديد صلابته 0
ونبقى زي ما قلت لنا :ـ
مادمنا ننظر للمستقبل نظرة أمل وتفاؤل وفرح
ونبقى زي ما قلت لنا :ـ
عندما تعزم على توديع الحزن والألم وأنك لن ترضخ للحزن مرة آخرى مهما حاولت تلك الجراح أن تدمي على القلب دمائها ومهما حاول الحزن التخلل في دواخلك 0
ونبقى زي ما قلت لنا :ـ
ما دمنا في سماء الأمل محلقين وعلى تراب التفاؤل نخطوا خطواتنا ونرى أثرها , وما دمنا نبذل ونعطي كل ما نستطيع من العطاء والجهد 0
هل رأيت الليل حين يلقي ظلمته وينيره القمر ؟
والأرض عندما تجف وتموت فيحيها المطر ؟

[allarinja]

زعيم الاحساس والمشاعر ( الامين الانسان )
سلام يازعيم
والله انت كاتب بارع ومبدع وربنا يوفقك ويحفظك
ونحن نستمتع بكلامك الرائع الجميل ( يا جميل ياحلو )
الامين دوم لنا بهذا القلم الرائع

يامن تتفاعل في ذرات تكويني بكل العشق الصوفي
حين أمارس إنتكاءة المقيل علي دندنة القلم ..
حينها تكون أنت الآذان حين تضج المشاعر بالتوحيد
فنصرخ من ضمن العشق إنها الجريف ياسادة ..
هي مقولة علي لسان شفاه تنطق ذاتي فتأخذني
بأن نقف لنسد الفرقة لنحمل الماء في أكفنا ونقف صفاً
في وجه الريح لنسقي كل من تلفحة الأمواج من فيض
حروف النداء حين يتوهج في العين المدي ..
كن بعافية أخي وإبن عمي وخالتي ..
أنا بعض منك أمارس الحب علي طريقتي ..
وعلي كيفي أُرقع جبتي أولا أرقعها ..
كن معي أحتاااجك حد الإرتواء فلي فيك ما أشتهي
يازول من عهد الحق

أبقي زي ماقلت ليك ..

[allarinja]

البكري عواااااااااااااااااافي..
لو كنا مثل الحديد لأتي من يذيبنا في حر الجمر حين يتفاعل الحجر والماء ..
لو كنا نماثل ضياء القمر فأنظر إلي دواخل القمر كتمة وضلمة وإنعتاق ..
حقاً تحرسوا ولايجي
وحقاً تلاوي وتقلعو ...
والله لو أني أحمل بيدي ثمرة لأكلتها وحدي !!!
وسمها أنانية العشق فكل إنعكاس يولد ضوءً يعني زواله .
فحين يمارس القمر إنعكاساتة في حضن الليل ياخذنا النعاس
ولكن حين تغمض عيناك يكون القمر هو الإحساس ..
هل نمارس اليوغا ليكون لنا الإكتمال في دورة الدم حين تجد
كل ماتملك يخرج من بين ثنايا الهدوء فيكون الإنفعال هو الذات ..
عذراً فالحزن فينا كائن يمشي علي ساقين !!!!!
هي عصاة في عيني ولك حرية الخيار بين الوجع النفسي والجسدي ..
ولي في ما ذكرت حق الرجوع ولكني أقف هنا علي أتأمل بعض ما أعايش
في تلاقي الصدي حين يكون السراب هو الإنسان
وأبقي زي ماقلت ليك

[بكرى الطيب هدية]

اللارنجــــــــــــــا عوافـــييييييييييييييييي


ونــبـقى زي مـا قـلـت :ـ
رغم المواجع ورغم الفواجع والمصائب
إنها دنيا الغـــــــرائب
ونــبـقـى زي ما قـلـت :ـ
إشراقة في كل يوم يجتاحنا هوج الرياح
نغالب الهم والشقى رغم كسور الجناح
نعيش الفرح ونزيل الجراح ونفارق الأتراح
ويبقى بصيص من نور الأمل يلوح في كل صباح
ونـبـقـى زي ما قـلـت :ـ
هل رأيت الحدائق حين تحزن فيلونها الزهر ؟
هل رأيت الأجواء حين تعصف فيثبتها المطر ؟

[allarinja]

البكري عواااافي ..
كما إنو العكار من طين ..
كمان من طين يجي الرواق ..
والناس تنشقة في الله ساعة الدرويش يغرق بالذكر في الحق ..
والزهر حين يصادف الذبول يكون العطر إختناق للنسيم
والمطر حين يصب في الغيم رعد وبرق القبلي نداه الدموع صباب
وبرق السافل نداه الخيال كضاااااااااااااااااااااااااااااااااااااب
ماغريبة نبكي في أفراحنا ونقلب الأفراح عووووووويل ..
الدمعة كضاب اليقول بت النكد .. الدمعة تغسل للعيون
وتحتريك في شهقة نفس ريدة عشق في الدنيا باكر في الليد مستحيل
إلا العين تباصر في الحلم ياقلبي روووووق ..
شلاع خيالك في البروق ماكان ده ريد ..
كان إحتمال تغيير قوانين حركتك ..

[بكرى الطيب هدية]

اللارنجـــــــــــا عوافـيييييييييييي
ونـبـقى زي ما قـلـت :ـ
حين تقرع الإجراس وتبدأ الأسفار حين تقسو الدنيا وتبكينا الأخبار
حينها نصمم أن نسير إلى آخر المشـــــــــوار
حين نتعلم تفسير الأسرار حين نحلل الأفكار حين نقاوم التيار
حينها نستطيع أن نواصل الأســــــــــــفار
وزي ما قلت
حينها تكون الكتابة فـــــــــــــــذة
حينها تكون الكتابة جميلة وعذبة
حينها تكون الكتابة زائدة رقــــــة

[عمر حاج الطيب]

ابقى زى ما قلت ليك (الروح)
ابقى زى ماقلت ليك (الحبيبة)
ابقى زى ما قلت ليك (الصديق)
ابقى زى ما قلت ليك (الزوجة)
ابقى زى ما قلت ليك (الوطن)
روح التفاؤل والامل هى دائما التى تتحكم فى مصائرنا وتكون الدافع القوى
ليكون الابحار عكس التيار لنتعلم فن العوم وليكون المسير فى طريق تحفه الاشواك
لنأخذ الحيطة والحزر وليتواصل المسير ولتكون الغاية الوصول الى تلك المرافئ
البعيدة وتكون حلاوة الوصول عزيمة لا تلين وقوة لا تضعف وارادة جبارة ونفس
وثابة لاتعرف الا ستكانة ويبقى الامل غالى وتحقيق الامانى صعب وبتلك الدرجة
من الاهمية
ورى البسمات كتمت دموع بكيت من غير تحس بى
***********
ولا تحسبوا رقصى بينكموا طربا فالطير يرقص مذبوحا من الالم
لابد وان نبقى زى ما قلت ليك هذا شعار التفاؤل شعار النجاح شحن الهمم
ورفع الروح المعنوية للجنود فى ميدان القتال وارض المعارك فالنصر فقط لا
غيره وهذه الوصية لنا ولهم ولها وله فى كل وقت وتحت كل الظروف
وابقى زى ماقلت ليك










9

[allarinja]

عمي عمر حاج الطيب هذا ردي
حملته روضة الحاج عني ..

عبثاً أحاول..! :::



عبثا احاول ان ازور محضر الاقرار
فالتوقيع يحبط حيلتى ويردنى خجلي وقد سقط النصيف..
انا لم ارد اسقاطه لكن كفي عاندتنى
فهي في الاغلال ترفل والرفاق بلا كفوف
اما البنان فما تخضب منذ ان طالعت في الاخبار
ان الحاتم الطائى أطفأ ناره ونفي الغلام
لان بعض دخان قدرته تسبب في المجئ بضيف
ورأيت في التلفاز سيف اسامة البتار
ينصب قائما في ملعب الكرة الجديد بنقطة اقصي جنيف..
وسمعت في الرادار
كيف يساوم ابن العاص قواد التتار ويحددون له
متى ..ماذا......ويقترحون كيف...
طالعت في صحف الصباح ان صلاح الدين سوف يعود من نصف الطريق
لان خدمات الفنادق في الطريق رديئة
ولان هذا الفصل صيف....
عجبي!!!
لقد نزعوا الاساور من يدي وتشاورا بالضبط تصلح
للمحرك في مفاعلنا الجديد علي اليسار..
فاحضر لنا الفا غيرها بل زد عليها قدر ما تسطيع من قطع الغيار..
خجلي لقد سقط النصيف ولم ارد اسقاطه
لكن كفي في الحديد ولا اري غير الغبار.....
عجبي لقد اخذواالخواتم من يدي
خلعوا الخلاخل والحجول وصادروا كل العقود
سكبو علي كلب صغير كان يتبعهم
جميع العطر في قارورتى بل انهم طلبوا المزيد
هرولت صوب المخفرالعربي حافية
لكنما كفي الي عنقي ومخفرنا بعيد
ياايها الشرطي
قد خلعوا الاساور من يدي
اخذوا الخواتم والخلاخل وصادروا كل العقود
بل انهم ياسيدي
- كفي وقولي باختصار
-العقد مااوصافه?
فر القلب من صدري
وسافر كالخواطر في نداوتها
ومثل نسيمة مرت علي كل المروج
قد كان يعرف كل اسراي الصغيرة
كان يسمع اهاتى وهمساتى
يعرف موعدالاشواق في صدري
ميقات العروج..
قد كان اغلي ماملكت
اهداه لي جدي وقال: اللؤلؤ العربي حر يا ابنتى ويجئ من شط الخليج,,,
اوصاف عطري??
هل شممت عبير مسك الاستواء....
في الغاب في الاحراش والمطر العنيف وكل سطوات الشتاء..
والرائعون السمر يفترشون هذي الارض في شمم ....
ويلتحفون اثواب السماء.....
يا ايها الشرطي اكتب ما اقول
واعد الى خواتمي
واساوري
وخلاخلي
واشتياقاتى
واحلامي واسراري
اعد للخدر حرمته وصل عزا
فوحدك من تصول حسنا
لقد دونت ماقلتيه سيدتى
نظرت بغبطة
فاذا بكل قضيتى قد دونت
عجبي!!!
فكل المخفر العربي يعرف سارقي
وضد مجهول بلاغي دونوه!!!


وأبقي زي ماقلت ليك

[الهندي بشير نابري]

( أبقى زي ماقلت ليك )
http://aljraif.com/vb/uploaded/2_999999999999.gif (http://aljraif.com/vb)
حينما يُخالج الحنين العقول حيناً ، تُولد أحاسيس الألم .
لكن . حينما يُخالج الحنين الروح ، تولد أحاسيس الفرح .

بس عليك النبي ياخي أبقى زي ماقلت ليك .

[allarinja]

الزول البشيل خاطر الورد عطر السلام
أبقي زي ماقلت ليك ..
وأمسح عرق ريدك رضاء ..
وأرحل مع النسمه القبيل شكل معالمك في الحضور
وأكتب مسافة الخطوه في ميل الحنين
وأنزع من الأرض الشمس شان تبقي ضل
وعاين وكت يبقاك غميد شان تمشي بي نفس الجروف
يتشهقك طين الأرض يسرح مع الخطوات يفوت
يوصل عكار الموية دمعات الأنين تلقي في جفنك صفاك
ياخ أبقي زي ماقلت ليك
ماغته عين شمس النهار كف المتاهات شان تشوف
لكن بنبني علي الدروب نسمات من الإحساس بتبقي
للخاطر مقيل ..
وأبقي زي كل السحب ساعة تشيل كثافة الشمس تنزل
علي الناس زي مطر ..
وأبقي زي ماقلت ليك