الوصية يا المشرف

[عصام عبدالصادق]

يا جماعة الخير أخوانا المشرفين
مريت على الموقع القديم ووجدت أن هنالك عضو جديد إسمه خرساني وصادف تسجيله رحولنا للموقع الجديد ... والمسكين لا قادر يدخل ولا قادر يتخارج ولا يوجد من يرحب به ... لذا أوصيكم خيراً بهذا الخرساني وحاولوا دلوهوا علىطريق موقعنا.
أيضاً أخونا صديق الجيلاني برضو صعب على ووجدته عمل مداخلة اليوم وبيخاطب في بدر .. وما عارف إنو بدر بيتحاوم في الموقع الجديد ومهموم بتعليم الزوجات ، لذا أخونا صديق الجيلاني لو إنتظر هناك عشان بدر يرد عليه ... الأراضي حا تتوزع وهو يبحث عن بدر، لذا حاول يا بدر المرور على الموقع القديم وجيب أبو مزن معاك.

[صديق النعمة الطيب]

عشان كده اقترحنا إنو البوست القديم إتأجر، علي الأقل ناس الايجار بستقبلوا الزول الرايح و بكرموهو و بوجهوهو عشان ما راسو يضرب و يطش،
و بعدين يا عصام إنت أساساً الوداك هناك شنو، ما قلنا ليك الحزن الشديد دا مافي مصلحتك، و البكا على الأطلال زمنو انتهى و غير ورم العيون ما بعمل شي، إنت بس حاول جادي تندمج في الموقع الجديد و كلها شغلانة أيام و بتنسى،،،
و بعدين أمبارح أديت الوصف لأخونا الشفيع، و طبعاً إتعذر و قال أنا الشوارع ما حافظة و ممكن أتوه و كمان قال إنو ما بقدر علي الرحول لأنو ما عندو وقت ينقل العفش و يقدم لقطعة أرض جديدة و يبني و خصوصاً إنو قاعد يبني في بيتو في السودان، المهم أعذار كده كتيره كترة، لكن أنا قلت ليهو بس أدي الوصف لأي بتاع تاكسي و بوصلك يعني دا ما عذر، و بعدين الحبايب كتار يعني ممكن تسكن مع أي واحد في أي بوست و كلنا أخوان، المهم في النهاية قال بصراحة ما بقدر يتحرك أسه و حا يجينا بعد شهر،
و قال لي خلي عصام يقدم لي لقطعة أرض و يدفع الرسوم و بعدين بحاسبو، و أنا وصلت الرسالة يا عصام حاول دبر الرسوم و قدم ليهو الزول برضو صاحبك و حبيبك من زمان يعني ما جات علي الرسوم، و بعدين الهندي بساعدك ممكن يخفض شوية،،،