ماشي مني

[يحيي عثمان عيسي]

أنا قلت ليك
اللحظة ما للبيع والشرا
اصلي قبلك خابرا
لما شابا
ومد ايديهو الشهابا
ونادي يابا
تعال معاي ..

كنت في جواي ...
حسيتك
وداريتك
معاك كتمت كتمانك
وناديتو و ناديتك
تمنيتو وتمنيتك
لو يعود لحظة ويسلم
او يوادع او يكلم

[allarinja]

نفس الدمعة النزلت مني لاقت رمشك
حضنت خوفي الكان في جوفك .. جوفك نادي الحضن
الفيني وقالد عصب الشوف وصابح همسك
الأخ يحي عثمان
_________________

القصة ما الريد المشي
ماالدنيا لسه مصنقره
القصة في الناس المعاك
والريده باقية مقنطره
_____________

الخطوة الماشة عليك
دخلت جوه الجرح النازف
الشتله القامت فيني
نادت مطرة البرق الخاتف
الشجر النايم فوق أكتافك
عرق الخطوة الراجع ناشف
الزهرة التبكي شذاها
من لونين صبحت نحلة تلاطف
قرصة عصب الشوف في الوجدان
حكت روحك واصبح قلبك واقف

[إخناتون]

يا وجع ساكن دواخلي لما يوم تبعد خطاك
لما أصنقر في المساء والنجوم تهجر سماءك
ولما شوقي يكون بكاء ويتعدى حد الشوق مداك
لما تخرج مني دمعة في فراقك والشعر يفقد بهاك
أصلي معذور ومن فراقك ماتت الأفراح معاك
تبراك عافية المطر والغمام يبراك حداك
وكوني يا أرض الوطن زهرة ينهل من شذاك
ترعاك دعوات المؤذن في الجوامع يا ملاك
والكنائس في الترانيم والقصيدة تطلب هناءك
يا ولدي يا شهقة شهيقي مع الأرض هوي يا براك
يا نفحة الريح والبذور كيمياء التراب وين صوت غناك
يا فرحة المطر البكب في حقلي حب وين رحيقك وين شذاك
تبراهوا دعوات المسيح حلق المديح ويونس البر الفسيح
ترعاهوا دعوات الذبيح هدهد سليمان وموسى البقوم للكسيح
ترعاهوا عافية الجبل والكهف والأرضى الحجر وكل من زار الضريح
هوي يا وليدي معاك دعاي ولحظة تكون غناي وترعاك ادعية المسيح

[عبدالله محمد نابري]

والله شرسيييييييييييين عديل كده !!!!!
يحى كوم ..
واللارنجا كوم ..
واختانون كوم تاني ... جاب لينا فيها مسيح وفسيح !!









برجع ليكم .. ترجع فيكم عافية المطر

[الطيب الامام الطيب الامام]

ابداع حقيقى ممزوج بعطر الحنية والمحبة وانشاء الله ولدك يصل بالسلامة ويجى راجع تانى وتانى يمشى منك عشان يزيد الابداع وبعد ابداع المشى منك منتظرين ابداع الفراق والبعاد عنك والغريب مهما طال غيابه مصيروا تانى يرجع تانى لى اهله وصحابه اللهم اجمعنا فى الفردوس كما جمعتنا فى الكوم وبتاريخ 12/1/2010 زكرة خاصة لن تنسى وبى نهاية اليوم هذا فى انتظار قصيده عن وداع الولد وسفره

[الطيب بخيت ادريس]

اخوي اللارنجا
مساء الخير والله يعينك على فراقك وليدك
وانشاء الله ربنا يصبرك
والله يعين أبوك على فراقك أنت ليه
(تمر أيام وتتعدى ونقعد نحسب في المدة)
أها رايك شنو ما بقيت شاعر

[الطيب بخيت ادريس]

يا وجع ساكن دواخلي لما يوم تبعد خطاك
لما أصنقر في المساء والنجوم تهجر سماءك
ولما شوقي يكون بكاء ويتعدى حد الشوق مداك
لما تخرج مني دمعة في فراقك والشعر يفقد بهاك
أصلي معذور ومن فراقك ماتت الأفراح معاك
تبراك عافية المطر والغمام يبراك حداك
وكوني يا أرض الوطن زهرة ينهل من شذاك
ترعاك دعوات المؤذن في الجوامع يا ملاك
والكنائس في الترانيم والقصيدة تطلب هناءك
يا ولدي يا شهقة شهيقي مع الأرض هوي يا براك
يا نفحة الريح والبذور كيمياء التراب وين صوت غناك
يا فرحة المطر البكب في حقلي حب وين رحيقك وين شذاك
تبراهوا دعوات المسيح حلق المديح ويونس البر الفسيح
ترعاهوا دعوات الذبيح هدهد سليمان وموسى البقوم للكسيح
ترعاهوا عافية الجبل والكهف والأرضى الحجر وكل من زار الضريح
هوي يا وليدي معاك دعاي ولحظة تكون غناي وترعاك ادعية المسيح


والله يالمعز أخوي ما باقي ليك شيء الا تكتب لينا
أنت يا أختاه مسيحية وأنا مسلم
ما شاء الله أبدعت عديل

القصيدة دي إجابة على سؤال أخونا صديق النعمة في (بوست كل من عليها فان)
(المعاناة تخلق الإبداع)

[يحيي عثمان عيسي]

( 1)

داير اقيل وداير ابيت
وداير اشوف امك يا بخيت
لما غطي النيل الترع
وفاض وجوه والوديان طلع
الطريق بيناتنا انقطع
وبدري فاتتني المراكب
ماشي لي اهلي الحبايب
ابدي من وين والقلب دايرلو صاحب

الرزق يا التومه فراق
وفري الهم والاشتياق لامن ارجع
واصحي نص الليل اجاهد
لاني راكع لاني ساجد
ابدي من وين والقلب دايرلو شاهد

[يحيي عثمان عيسي]

(2)

قمريه قوقت في فرع
إلتاع القلب فزعا فزع
نزل الدمع
حامدنو .. حامدنو ياقمريه حامدنو
الماهية جات منو
ما عندك خبر تاني


ابونا الفاتنا ليهو سنين
غارق في العرق والطين
متين يرجع يطمنا

بخاف لو قمت نص الليل
عشان ولدي الصغير يرضع
بخاف لما الصقت ينزل
واصحي ادخل الشفع

بدورك يا ابو عيالي
تغطي ديونا في الدكان
ويسمع حسك الجيران
وتتونس معي اولادي

[يحيي عثمان عيسي]

(3)

الوقت كان آخر الليل
وكانت الحله مقمته
فوقا صاحي القمر الجميل
والبيوت تحتو مشتته
زي كتابه على المناديل

الكلب هوا على الدرب
الطياني جا يمشي ويخب
دخلتو البيت صحت المره
العواطف سما ممطره
والكلام عبرات في الحلق
لحظة ما للبيع والشره

قام بخيت بي خشمو سلم
والبنية بقت تبتسم
شالا بوها في صفحتو
بلي شوقو وفرحتو
وروهو اخبار البلد
بت نعيم اتعرست
بت نعمة الله جابت ولد

من دقش شال البلد
لا خدارا عندوا فيها
لاهو زارع لا حصد
داير يسلم وداير يصافح
كل يد
في البلاد البشتهيها

[يحيي عثمان عيسي]

(4)

كل الوجوه اتغيرت
كل الملامح انمحت
قالولو من وين
الزول منو
وين خدارك
وين عيالك
جيتا من وين
: من بلادا تلبس العراقي تتهجا العناوين
والبلاد البشبهنك كنتى فيهن
شايل الحزن البجنن
إلا كيفن ما عرفت
أنو فصل الشوق مزور
: وجاها من وين
: جاها يتسلي ويجامل
: وانتي مالك وين خدارك
وين عيالك
قلبي فيها ودربي فيها
في عواجيزا وصغارا
في تقاويها وخدارا
وجيتا اطمن عليها
وداير اطمن عليها

[يحيي عثمان عيسي]

(5)
دي حكاية قريه فوق النيل
وشاحا تقيل
ومحصول الفرح فيها
بينضح كل ليل
مزحومة سكة الراجعين
وصوت في صوت
بتتداخل وتتناسل
تقول للفضلوا قاعدين فوق
جيناكم
قريه فوق النيل فرحانه
وما لاقية البقول ليها
الطياني انسان
من عيونو تطير عذابات البيوت الاتبنت
فاتوها اهلا
الطياني انساني
وليل المغترب رحلة دموع مجان
وزمنك يا غريب مرهون مقدر
يا سالك دروب الصدفه والاقدار
الطياني زيك
بس بتختلف النتيجه ويفضل المشوار
بس بتختلف النتيجه ويفضل المشوار

[يحيي عثمان عيسي]

رمضان كريم يا محمد
صايم صيام الضب
زلا صيام الرب
رمضان كريم يا محمد